Sobre-desaroyo sin debido planificacion di turismo a largo plazo a conduci na un aumento drastico den perdida di teranan natural

Milton Ponson reflehando riba Dia di Medio Ambiente

• Atende Conferencia Internacional cu ex-Ministro Tico Croes como panelista 

ORANJESTAD (AAN): Diaranson cu a pasa, tabata “Dia Mundial di Medio Ambiente”.  E organizacion local di Rainbow Warriors Core Foundation, a splica cu e Dia Mundial di Medio Ambiente dirigi pa UNEP (Programa di Nacionan Uni pa Medio Ambiente) y celebra cada 5 di Juni desde 1973, ta e plataforma mundial mas grandi pa concientisacion ambiental y celebra pa miyones di persona den henter mundo.

   Milton Ponson di Rainbow Warriors Core Foundation a splica cu pa 2024, e tema tabata “Restoracion di Teranan, De-certificacion y Resiliencia contra Secura”.

   Situacion na Aruba: Segun Ponson, un sobre-desaroyo sin debido planificacion di turismo a largo plazo a conduci na un aumento drastico den perdida di teranan natural cu mata, tanto den mondi como area habita y tambe pa agricultura. Degradacion di ecosistema y tambe tereno pa agricultura a causa impacto riba e biodiversidad na Aruba en particular pa especie endemico manera nos shoco, prikichi, raton pata blanco, raton di anochi y algun mata manera palisia blanco y cora.

   E creacion di nos Parke Nacional Aruba, cu fuera di Parke Arikok tambe ta inclui e zona humedo di Spaans Lagoen, cuater area di Parke Marino Aruba y mas di un dozijn area mas tabata un comienso pa den forma structura conserva naturalesa y proteha biodiversidad di alrededor di 30% di nos teritorio nacional.

   Pero sin un Ley pa Maneho di Medio Ambiente y sin un Ley pa Maneho Maritimo, keto bay ta posibel cu hotel por ser construi den areanan vulnerabel banda di area cu ta cay den Parke Marino y of Parke Nacional Aruba, manera den e caso di Secrets Resort na Sero Colorado.

Y keto bay teranan natural ta ser degrada door di uso di vehiculo offroad (UTV y ATV). Cu e aumento drastico di camber di hotel y unidad di Airbnb biniendo online ta premira un necesidad grandi pa vivienda nobo y ampliacion di nos infrastructuranan den areanan habita y di interconeccion.

   Planificacion di zonanan terrestre (ordenacion teritorial), esta planificacion geo-espacial terestre y planificacion geo-espacial marino pa areanan costal y di laman den paisnan isla chikito den desaroyo (Small Island Developing States, SIDS) ta bay man den man y hopi biaha de facto por considera practicamente e teritorio completo como area costal, manera den caso di Aruba.

   Fuentenan di awa dushi pa agricultura na Aruba practicamente no ta existi mas, cu posnan di awa dushi y dam conteniendo awa contamina. Pa nos restora ecosistema, restora suelo, restora vegetacion natural y revitalisa fuentenan di awa dushi ta bay rekiri introduci e Ley di Maneho pa Medio Ambiente y e Ley pa Maneho Maritimo.

   Recientemente a ser teni e di Cuater Conferencia Internacional pa SIDS di Nacionan Uni, 27-30 mei na Antigua. Rainbow Warriors Core Foundation como unico NGO accredita a participa den e conferencia aki y a enfoka riba temanan di resiliencia climatico, e papel estelar di ciencia den desaroyo sostenibel, conservacion di biodiversidad, maneho di data y infrastructura digital pa desaroyo sostenibel y en particular pa planificacion geo-espacial terestre y marino.

   Den e ultimo cuadro aki a atende e presentacion titula “Restoring Coastal Community Economies Through Innovative Technologies, Coastal Resilience and Restoration”. E presentacion tabata consisti di dos panel, uno dunando un introduccion di tecnologianan cu ta usa y genera data geo-espacial manera entre otro satelite y sensor (remoto y local) y con pa haci uso di modelo digital pa planificacion terestre y marino predecibel pa areanan costal pa asina por anticipa y mitiga vulnerabilidadnan y riesgonan causa pa cambio climatico.

   E di dos panel tabata conisti di e programa di Blue Community, esta “Restoring Coastal Community Economies through Coastal Resilience and Restoration” den cual diferente stakeholder a presenta case studies con pa atende cu e tematica aki. E di dos panel a ser modera door di Robertico (“Tico”) Croes, profesor di University of Central Florida’s Rosen College of Hospitality Management. Experto den creaccion di strategia pa maneho di desaroyo sostenibel di turismo pa SIDS, el a ser invita recientemente door di presidente di Asamblea General di Nacionan Uni pa duna un lectura den e High-Level Thematic Event on Tourism, parti di e promer Siman di Sostenibilidad di Asamblea General di Nacionan Uni.

   E presentacion aki tabata un excelente introduccion na tecnologia y strategia util pa restoracion di ecosistema, tera, combati perdida di vegetacion y revitalisacion di fuentenan di awa dushi, hustamente e tema di Dia Mundial di Medio Ambiente 2024.