SNBA ta contento cu e hotel di Perret Group cu ta bin ta uno pro naturaleza

ORANJESTAD (AAN): Dentro di algun aña area di Colony ta bay haya un Boutique Hotel di 40 camber, unda cu antes Nanki Club tabata situa.

E hotel ta bay ta un asina yama Eco Lodge, cu ta ambientalmente sostenible.

            E proyecto cu ta worde desaroya pa Perret Group y sosteni pa San Nicolas Business Association (SNBA).

            Durante un conferencia di prensa, presidente di SNBA Andres Hernandez kende a bisa cu a tuma basta tempo, combersacion y reunion, pero porfin e proyecto ta bay bira un realidad.

            “Mi mester yama un danki na full mi board, cu nan a sa di tey semper, apoya esaki y apoya locual ta pariba di brug”.

Nos ta spera cu e contratemponan rond di Secrets Hotel lo worde soluciona pronto tambe, segun Hernandez.

            El a sigui bisa cu e pida tereno unda cu Nanki Club tabata situa ta uno unda cu muchanan sa bay hunga y e ta hopi peligroso, mirando e estado di e lugar y partinan di edificio cu a cay den otro.

            “Awe nos ta contento pa bisa cu Alberto Perret Gentil di Perret Group a firma e opcion pa cuminza oficialmente cu e proyecto cu ta bay bira un joya pa nos”, segun e presidente di SNBA.

            Hernandez a bisa tambe cu e hotel ta bay ta uno bunita y traha pro naturaleza.

El a indica cu e ta bay ta un hotel cu tokenan di Aruba, cu ta bay contribui grandemente cu prosperidad di pariba di brug.