ORANJESTAD (AAN): E asunto di bay para den rij pa cumpra carchi pa asina bo drenta un evento di Carnaval 71,
ta bay bira aun mucho mihor compara cu antes. Esey ta algo cu President di SMAC, esta Darren van Ommeren mes a confirma.
El a splica cu desde luna di October 2024 caba, tur carchi pa evento di SMAC cu ta encera Festivalnan di Tumba infantil y hubenil, Festival di Calypso y Roadmarch infantil y hubenil, Festival di Tumba grandi, Eleccon di Reina Infantil y Hubenil, Eleccion di Reina Grandi y Señora Carnaval, ta wordo bendi di awor caba riba e App di transferencia y compra di Pay.aw
Van Ommeren a splica cu desde awe caba ya por bay riba Pay.aw pa cumpra e carchinan. Tin hopi hende cu ya a cumpra carchinan.
Cumpra ticketnan individual: Segun e president di SMAC, loke nan ta bay haci entrante e siman aki ta bay cuminza ofrece e parti di cantantenan individual, y e reinanan individual, pa subi nan ticketnan online, debi cu ta apenas awor na December e inscripcion a cera.
Pues awor cu e Oficina di SMAC a habri bek pa Carnaval 71, nan ta bay check exactamente e nomber di participantenan, y riba Pay.aw ta activa nan carchinan individual, cu bo por cumpra e carchi riba e nomber di e cantante of candidata di reina, y durante evento of eleccion, Pay.aw lo bay anuncia cual cantante of candidata di reina a bende mas ticket riba nan sistema online.
