Na Biblioteca Nacional diahuebs proximo:
ORANJESTAD (AAN): Diahuebs 9 di januari di 6.30 pa 9.00 p.m. lo tin e prome actividad pa 2025 na Biblioteca Nacional Aruba, George Madurostraat Oranjestad, ‘Pa Un Bon Comienso 2025’ y celebrando ‘60 Aña di Recuerdo hunto cu Trio Los Arubeños’.
Den cooperacion cu Astrid Britten, Biblioteca Nacional Aruba, Siegfried Dumfries, Departamento di Cultura Aruba y Mirto Laclé, Gestor Cultural lo presenta un anochi excepcional cu ‘Homenahe na Trio Los Arubeños’ y ‘Recordando Hubert (Lio) Booi’. Lo presenta un programa multidisciplinario cu enfoke riba musica, canto, declamacion, cultura, literatura y educacion en general.
Integrantenan di Trio Los Arubeños, Rey Lampe, Fortunato (Catey) Werleman y Mario Croes ta embahadornan musical y cultural di Aruba. Orguyosamente nan ta comparti cu pueblo di Aruba e celebracion di nan 60 aña di existencia como Trio Los Arubeños. E trio no solamente ta celebra su 60 aña di existencia, sino henter un bida di recuerdo. Nan lo brinda cancionnan, particularmente na Papiamento, dunando aporte na cultura di Aruba riba tereno musical.
Lo brinda atencion ‘Recordando Hubert (Lio) Booi’ pa conmemora su bida y dies aña di fayecimento (21 di dec. 2014-2024).
Antonieta Ras-Booi hunto cu Hubert Ras lo comparti y interpreta algun cancion. Lo no falta musica di caha di orgel ‘Mi Dulcita’ di Hubert Ras hunto cu Peterangelo Ras, presente y futuro.
Lo duna reconocimento na algun persona cu a destaca y a promove cultura y folklore di Aruba, entre otro Sr. Leoncio ‘Maiky’ Croes (1930), leyenda y baluarte musical di Aruba.
Coro La Escala bou direccion di Hector (Chichi) Perez lo deleita cu algun cancion.
Grupo di Dande lo ta presente pa desea un y tur un bon comienso pa Aña Nobo 2025.
Entrada ta gratis. Bin celebra na Biblioteca Nacional Aruba cu ta celebrando su 75 aña di existencia.
