*Mester haci algo aworaki
ORANJESTAD (AAN)— Janine Rodriguez di Slachtofferhulp, den entrevista cu DIARIO a bati alarma tocante e problemanan cu hopi adulto mayor, aki na Aruba, ta confronta cu ne, entre otro negligencia, falta di atencion y soledad. Y ta un situacion cu señora Rodriguez ta mira aumenta cada dia.
Tin instancianan cu e ta yama pa drenta yuda, pero e situacion ta birando cada dia mas grandi. Algo cu el a para hopi riba e tema, y a papia hopi biaha tocante yiunan cu ora yega cas no ta haya e mama, grandinan cu ta bay for di cas, of ta wordo haya den un lugar sin come, y no kier bay cas mas y, asina, e situacion ta hopi amplio.
Pero tin casonan cu e ta mira cu e ta bisa “ban traha riba esey aworaki”. Ta trata di problemanan social y emocional den famia, y tur cos, entre otro soledad cu ta un problema grandi, tin di e grandinan aki cu ta bira demente, of tin cu a stop di come y no kier papia mas, y nan mes ta pidi diferente cos.
Tin biaha ora nan yega cas nan tin cu wak pa yiu of yiunan ta trece nan yiu pa nan cuida, tin yiu cu ta droga, tin di nan cu no por yega na nan remedi, y esaki ta parti di e problemanan grandi cu adultonan tin.
Rodriguez ta comenta cu tur dia desde cu el a drenta e trabao di Slachtofferhulp, e ta mira e problemanan aki. Sea polis ta yam’e of e famianan mes ta yam’e, y tin biaha hasta ImSan of Hospital ta yama, pa weita kico a pasa, kico tin, con leu e ta, con a para, etc. Tin instancianan cu ta bis’e cu ora e tin cu subi caya, yama nan, y esey ta dun’e forza. Pero ta sigui e pregunta, unda ta hiba e persona(nan), por ehemplo den oranan di marduga, no tin caminda pa pone e grandinan aki. Den oranan di mainta Sociale Zaken ta drenta den e asunto pasobra tin cu hiba e personanan aki na nan cas, pero tin ora nan no kier drenta nan cas mas.
El a indica cu señora Helder, director di DOZ ta bezig cu busca un solucion, y e ta keda para banda di dje, pasobra e problema ta hopi grandi. El a yega di traha riba e tereno aki caba y e sa con grandi e dolor di e grandinan aki ta.
“Nos por bin cu ley, of bin cu kico e ta pero ban cuminza traha, lanta nan luga busca esnan cu mester traha aden, pasobra bo no por saca un hende asina di riba caya, y pone bek riba caya. Si e tranca ki a para? E problema lo bira hopi mas grandi den futuro si nos no haci algo awo!” Janine Rodriguez a enfatiza.
“E hendenan aki a traha duro pa nos. Semper mi ta bisa cu nos grandinan ta oro. Nan ta traha pan pa nos duna nan aworaki, pa nan biba un bida mas trankil, no pa hinca nan den un camber, den un cas, of bo ta sali coi nan cosnan. Hopi di esnan cu ta bay bira grandi awo ta keda traha, pasobra kico nan ta bay keda haci na cas?” señora Janine Rodriguez a señala.
