Segun Directora Interino di SKOA, Jessica Irausquin:
ORANJESTAD (AAN): Segun informacion ricibi for di Directora Interino di SKOA, señora Jessica Irausquin, tur cos ta cla pa apertura di aña escolar 2026-2027.
Señora Irausquin a indica cu SKOA ta hopi satisfecho cu e manera cu aña escolar 2025-2026 a transcuri y cu e resultadonan obteni. Pa e motibo aki, e organisacion ta considera e aña escolar cu a pasa como uno exitoso y ta mira cu confiansa riba aña escolar cu lo cuminsa diahuebs awo.
Pagonan escolar durante e aña cu a transcura, tawata casi complete y den preparacion pa aña escolar 2026-2027, pagonan escolar ta drentando satisfactoriamente. Den casonan unda ta necesario, algun mayor a opta pa haci un areglo di pago, di manera cu nan por cumpli cu nan obligacionnan.
Tocante e resultadonan academico, señora Irausquin a destaca cu SKOA ta particularmente satisfecho cu e hecho cu un promedio di 80% di e alumnonan di 5 MAVO a logra gradua na final di aña escolar 2025-2026.
Na mes momento, el a reconoce cu tin varios hoben cu, pa diferente motibo, a laga scol prematuramente y consecuentemente no a logra completa nan estudio. Esaki ta un aspecto cu ta sigui merece atencion, pa por stimula mas hoben pa completa nan trayectoria escolar y aumenta nan oportunidadnan pa futuro.
Cu inicio di aña escolar 2026-2027 na porta, SKOA ta desea tur alumno, mayor, docente y personal escolar hopi exito. E organisacion ta expresa su confianza cu, cu cooperacion y compromiso di tur parti envolvi, e aña escolar nobo lo por sigui construi riba e resultadonan positivo alcansa y brinda cada alumno e miho oportunidad pa progresa y logra su metanan.
