SKOA a organisa su Congreso Nacional di Enseñanza 2024, semper cu e meta di profesionalisa su maestronan

Directora Anuesca Baly:

ORANJESTAD (AAN) – Den un entrevista cu DIARIO, señora Anuesca Baly, Directora di SKOA, a duna informacion tocante e Congreso Nacional di Educacion 2024, cu a tuma lugar e siman aki.

Señora Baly a comenta cu desde aña 2018 SKOA a cuminza cu e Congreso aki, cu e director anterior, pa profesionalisa su docentenan. SKOA ta organisa esaki pa tur su 650 trahador, y a bishita otro Bestuur Leidernan y Bestuurnan di Scol.

Baly a splica cu e meta di un Congreso manera esaki, ta pa ekipa e maestronan pasobra maestronan no tin e oportunidad di sigui cursonan, manera un dokter si por haci cu regularidad. SKOA a tuma e liderazgo aki, pa profesionalisacion di su maestronan.

“Nos kier ekipa nos maestronan cu diferente curso, workshop, unda cu continuamente nan ta keda crece y educa nan mes”, directora di SKOA a señala.

El a señala cu aña pasa SKOA a haya e Acreditacion di Erasmus Plus, siendo e prome Scol bestuur di Aruba y henter Antiyas cu a haya e acreditacion aki, unda cu tambe su docentenan a haya e oportunidad pa bay haci un intercambio den paisnan di Europa, paga pa fondonan di Union Europeo. Pero esaki no solamente pa e docentenan sino pa alumnonan tambe.

Tin un grupo cu ta bayendo otro aña unda e alumnonan ta bay haci intercambio na Spaña, unda nan ta siña, ta crece, y ta educa nan mes riba otro nivel.

E meta ta cu ora SKOA traha su plan strategico, pasobra e ta kere den profesionalisacion di su maestronan, como bon dunador di trabao tin cu duna nan e oportunidad.

El a agrega cu tin biaha scolnan mes ta organisa tayernan di trabao cu ta wordo sostene door di Directie Onderwijs of Instituto Pedagogico Aruba. Pero den e caso aki ta SKOA mes ta hacie pa tur su trahadornan y nan mes ta scoge e cursonan cu nan kier pa wordo duna.