SKOA a cuminza oficialmente cu inscripcion di mucha pa scol preparatorio, periodo 2022-2023

ORANJESTAD (AAN) — Diaranzon, oficialmente, e inscripcion pa muchanan cu a cumpli cuater aña prome cu 1 di December en curso, a habri na SKOA pa scol preparatorio, pa aña escolar 2022-2023.

Director di SKOA señora Anuesca Baly, den conferencia di prensa a splica cu esaki ta hopi importante, pasobra cuater aña ta e edad cu tur mucha mester cuminza scol preparatorio.

El a subraya cu tur mucha cu a cumpli cuater aña tin e derecho y e mayor tin e deber di percura pa e yiu cuminza scol.

Mirando cu e pandemia ainda ta vigente, SKOA ta cumpli cu tur rekesito y e ta traha conhuntamente cu DVG a base di e protocolnan cu nan ta pone dilanti pa salvaguardia e alumno y e maestro na scol. Esaki ta keda vigente te ora DVG dicidi cu e protocol ta cambia. DVG ta reuni no solamente cu SKOA pero cu tur centro di educacion na Aruba, y ta pone nan na haltura di e protocolnan y nan ta wordo implementa, y SKOA ta cumpli cu esaki tambe.

Director di SKOA a subraya cu no tin limitacion di inscripcion pasobra nan tin 15 kleuterschool, y pa SKOA ta importante pa tur mucha haya un cupo, y pesey nan ta cuminza hopi trempan cu informacion na mayornan, pero tambe na e crechenan, cu por informa e mayornan di nan alumnonan. Mayornan cu no ta hiba nan yiunan crèche, pero tin nan na cas y cu ta wordo cuida pa un wela of tanchi, tambe ta bon pa nan sa cu ora e mucha cumpli cuater aña prome cu 31 di December mester wordo inscribi pa scol preparatorio.

Seguidamente, señora Geerman, administrador di SKOA, na departamento di inscripcion a hiba palabra y a invita mayornan pa haci inscripcion di nan yiu.

El a splica cu SKOA ta sigui cu e sistema di inscripcion online cual ta hopi facil. Locual cu cada mayor mester tin na man, ta e papel di censo di cinco florin, e carnet di AZV si ta valido ainda, y si no, screenshot e AZV digital cu mester download.

Pa muchanan cu no tin documento, SKOA ta ofrece nan tambe, e oportunidad pa inscribi. E documentonan cu ta rekeri ta e Acta di Nacemento y passport di e mucha, y mayornan tin cu cumpra un seguro priva pa e aña escolar entrante ( periodo 22-23). El a reitera cu pa 2022 e mucha mester tin 4 aña pa e por cuminza scol preparatorio na Augustus proximo.

El a splica cu importante ta ora cu haci e inscripcion pa e mayor yena su  e- mail adres corectamente, na momento cu ta pidi esaki. Esaki pa motibo cu ora di haci e peticion e mayor, automaticamente, ta haya un e-mail bek splicando cu e mayor su e-mail a drenta e oficina.

Den menos di un siman e persona lo haya e carta di ubicacion, na unda cu su yiu a wordo ubica. Si e mayor no ta haya esey, e por tuma contacto cu SKOA via su e-mail “learning en administratie” of por hacie tambe via facebook di SKOA y asina nan ta follow up riba e mayor su peticion. Sra. Geerman ta invita cada mayor, crechenan, peuterschool, speelschool, pa nan haya informacion. SKOA lo reparti flyers rond pa yuda e mayor pa haci e inscripcion di nan yiu. Si e mayor no tin mucho habilidad pa haci e inscripcion online, SKOA ta habri pa yude pa haci su peticion na tempo pa su yiu wordo ubica na un scol.