Edsel Figaroa, Presidente di TOPA
- Dificil pa compronde con e trahadonan por haci nan trabao
- Caso di Malesanan tambe tin hende preocupa
ORANJESTAD (AAN): Edsel Figaroa, Presidente di Trahadonan Organisa di Sector Publico di Aruba (TOPA) a splica den un entrevista cu DIARIO, cu nan a manda diferente carta pa Minister di Husticia, y nan no a haya niun contesta, mientrastanto, tabatin yen procedura cu a tuma luga manera con pa atende cu e presonan, con e trahadonan mester usa handschoen y tapaboca, pero ta resulta cu un caminda cos a bay robes, y e trahadonan a wordo contagia.
Manera ta conoci, den luna di april a keda constata cu tabatin tres caso activo di Tuberculosis a keda diagnostica na Instituto Corecional Aruba (KIA), na unda tur caso diagnostica a wordo isola y trata. Tambe tabatin 8 caso mas pero no ta di tuberculosis activo.
Segun Figaroa, e mas fastioso di e asunto aki, si un hende ta wordo contagia, nan no ta haya sintoma awe of mañan, ni den un siman. E ta tuma su tempo, probablemente un luna of mas. Mientrastanto, e persona aki ta na cas cerca su famia y amigonan, y asina e contagio tin chens di bay mas leu. Pa e motibo aki nan kier a sinta cu Minister mas lihe cu ta posibel, pa wak kico por wordo haci.
Figaroa a señala cu tin testnan a tuma luga na pia di trabao, pero tin trahado cu riba nan mes a bay haci test otro caminda. Y ta den un di e casonan aki a bin resulta cu un trahado a test positivo pa Tuberculosis. El a enfatisa cu e no por bisa con e situacion actual ta, si acaso por ta un trahado por a faya, loke si a wordo constata cu personal di KIA si a wordo contagia.
Situacion na KIA ta hopi malo, Figaroa a bisa cu ora e mes no ta ni haya gana di drenta eynan y no lo por traha eyden tampoco. E situacion ta hopi deplorabel y e ta compronde e disgusto di e trahadonan. Den diferente occasion e presidente saliente di TOPA a boga pa drecha e edificio, of traha un nobo. El a agrega cu e no por compronde con e trahadonan tin e animo pa traha tur dia den un situacion asina malo.
TOPA a pidi reunion cu e Minister concerni y ainda ta wardando un contesta, pero Figaroa a enfatisa cu no ta nan ta dicidi, sino ta nan miembronan. Si e miembronan dicidi cu ta basta, nan lo sostene nan completamente.
