Temporada local di vacacion y turismo ta topa den amenaza creciente
*Aruba mester wordo prepara pa impacto internacional di calor
*Alarma medico mundial pa resultado “sea, sun and sand”
ORANJESTAD (AAN) — E momento cu schoolnan lo cera nan porta pa vacacion grandi 2025 ta dilanti porta. Un parti di poblacion di Aruba ta prepara pa bay disfruta ma beachnan di e pais, cu ta tambe e etiketa pa turismo y asina economia Arubano.
Si normalmente den e temporada aki ta tene cuenta cu por ehempel pasashi di horcan por haci cu alarma mester wordo bati, otro aspecto mucho mas importante ta bira cada momento mas pronuncia.
Si na Aruba mes den publico no tin atencion pa e forma culo bay atende cu e realidad cu ta exigi cambio di e pakete cu e turista lo busca durante su vacacion, mundialmente si e punto ta centro di combersacion debi na e riesgonan cu e ta encera pa negoshi di turismo.
En corto por conclui cu e mihor amigo di economia den region di Caribe, a bira su enemigo scondi den e peligro di cambio di clima, cu hasta na paisnan cu no ta parti di regionnan tropico, ta exigi pa medidanan wordo tuma pa asina proteha bida humano.
Oficialmente e temporada abou di turismo di Aruba a haya su inicio pero debi na e popularidad di Aruba como destinacion sigur pa turistanan Mericano, Aruba no conoce un temporada den cual manera na cierto paisnan, e negoshi ta wordo seriamente afecta te awor.
E peliger cu por influencia e realidad di turismo den verano na Aruba, ta directamente mara na e atraccion mas importante di turismo na Aruba cu ta “sea, sand and sun” (laman, beach y solo).
E union di e tres factornan aki den e cambionan rapido di clima, ta haci cu hopi turista ta pensa bon prome cu nan dicidi cu si na e riesgo di topa cu un horcan, nan lo tuma e riesgo tambe pa confronta problemanan di salud debi na e forma cu calor intenso cu por spera na beachnan y riba laman lo por entrega.
Den revision di DIARIO di articulonan cu ta wordo dedica na e region di Caribe como destinacion turistico den vacacion, ta bini claramente dilanti e advertencia enorme pa calor.
Advertencianan ta wordo lanza no solamente pa e temporada di horcan manera normal, pero mas y mas tambe pa e impacto directo cu exposicion na e calor intenso cu lo por spera, lo forma sigur pa hende pues cu ya tin problema cu nan salud.
Cifranan registra di calor na 2023 y 2024 ta wordo presenta pa bati alarma pa loke por spera na 2025 na e beachnan caminda santo ta uni cu solo y laman pa crea un sensacion enorme di calor y un peliger directo pa salud di hende.
E atraccionnan di naturaleza ta topa cu e peliger cu turismo ta nifica gozo y hopi biaha turistanan ta uza bebidanan alcoholico tambe cu ta wordo presenta den e ambiente di calor extremo.
Peliger serio cu den cantidad di publicacion ta wordo lanza como advertencia na publico den exterior, cu ta e mercado di turismo pa Aruba.
Expertonan riba tereno di clima ta uni na expertonan di salud pa splica e peliger cu cambio di clima ta crea na beachnan fabuloso.
Sigur combina cu alcohol, cu ta parti di gran variedad di bebidanan exotico cu ta wordo presenta na turistanan na beachnan, no solamente mester tene cuenta cu e peliger di salud pero tambe e impacto cu tin pa e disposicion total di hende cu por sufri efectonan di buracheria mas facil den calor.
Esaki ta conduci na problemanan den conducto humano, cu tur resultado cu e por tin.
Pa damanan cu ta en espera di un baby, tambe advertencianan ta bay ya cu uno di e peligernan di calor intenso ta e posibilidad di parto prematuro, cu complicacionnan pa mama y yiu.
Informacionnan cu DIARIO ta ricibi di condicionnan di tempo ta suficiente pa bati alarma na Aruba, cu un economia cu ta depende di turismo den cual e informacionnan cu agentenan di biahe ta duna pa proteha nan mes contra reaccionnan di clientenan malcontento, ta aumenta mescos cu publicacionnan internacional cu ta adverti pa e impacto di “sea, sand and sun”contra salud humano y e forma cu beach no ta recomendabel den temporada calor!
