Minister Geoffrey Wever: --- ORANJESTAD (AAN): E desaroyonan rapido riba nivel global, e importancia di desaroyo sostenibel, transparencia, contabilidad y e derecho riba informacion di e cuidadano,
ta haci e establecimento di un ecosistema innovativo y duradero di data na Aruba absolutamente necesario.
Minister di Asuntonan Economico, Comunicacion y Desaroyo Sostenibel, mr. Geoffrey Wever, ta consciente di e desaroyonan aki y di e paso cu mester tuma.
Diferente investigacionnan haci den pasado door di organisacionnan internacional manera entre otro “United Nations” y “International Monetary Fund” a mustra e importancia di establece un Sistema Nacional di Estadistica (Nationaal Statistisch Systeem ("NSS")) na Aruba. Den cuadro di e medida di Landspakket A.2, un NSS tambe lo contribui na mehoracion di calidad di data pa desaroyo di maneho y pa e proceso di tuma decision den cuadro di un miho control financiero di gobierno.
Un NSS ta di importancia pa desaroyo sostenibel di un pais y ta un elemento indispensabel den e systema di informacion den un sociedad democratico. Un NSS ta na servicio di gobierno, economia y e publico nacional y internacional door di produccion di dato estadistico riba e situacion economico, demografico, social y medio ambiental. Pa logra e meta aki, e estadisticanan oficial mester cumpli cu rekisito internacional cu tin di haber cu e relevancia, confiabilidad, actualidad y uzo practico di e dato produci. Alabes e datonan mester wordo haci publico di manera imparcial y di manera comprendibel pa cada un.
Aruba no tin un sistema coordina cual ta compila, warda y intercambia datonan estadistico di un manera practico, eficiente y uniforme. Solamente cu informacion corecto y confiabel riba diferente tereno, gobierno por tuma miho decisionnan y monitor e resultado di maneho. Por tambe evalua y ahusta unda ta necesario. E establecimento di e NSS ta nifica cu un colaboracion structural lo wordo crea entre departamentonan y instancianan cu ta colecta, procesa, analisa y publica datonan.
Recientemente, Minister Wever a haci un peticion na Conseho di Minister - cual a keda aproba - pa e formacion di un Comision Sistema Nacional di Estadistica, bou guia di Oficina Central di Estadistica (Centraal Bureau Statistiek), pa e implementacion di e NSS. Pa fin di maart 2022 e Comision Sistema Nacional di Estadistica lo presenta un plan di implementacion na Conseho di Minister.
“Mi ambicion ta pa establece un Sistema Nacional di Estadistica fuerte y innovativo pa investiga den cua forma “Open Data” por wordo introduci na Aruba, teniendo confidencialidad y e aspectonan tecnico y huridico nesecario na cuenta”, segun Minister Wever. Cooperacion entre gobierno, NGOs, mundo academico y sector priva, lo fungi como catalisado pa e establecimento di un ecosistema innovativo y duradero di data na Aruba.
