Sistema di A.I. ta yudando tur cushina di Iberostar pa reduci desperdicio di cuminda

E ta wordo uza pa haci analisis tur dia

ORANJESTAD (AAN): Diamars mainta, DIARIO tabata presente na JOIA by Iberostar pa asina mira con e Resort aki, specialmente e area di cushina ta haciendo uzo di Inteligencia Artificial (A.I.) pa asina e compania reduci desperdicio, evita cumpra demasiado cuminda, y na final spaar hopi placa.

   Na yegada, DIARIO a wordo ricibi door di Ghislaine de Windt Kemmerling, kende hunto cu Chef Ludwich Samson, Jareth Vermeulen, y Stefany a presenta na un forma orguyoso, con nan ta haciendo e propiedad nobo aki bira aun mas sostenibel, door di educa nan propio empleadonan pa sigui riba e trend mundial di 3R, esta ‘Reduce, Reuse, Recycle’.

   JOIA a manda busca 3 aparato sofistica cu ta wordo instala den Cushinanan, pa asina cada rato cu benta desperdicio afo den un baki, e mashin ta saca potret y ta analisa e contenido y ta pisa esaki tambe.

   Empleadonan di Cushina a ricibi training riguroso duna door di Stefany di Departamento 3R, y awor ta tur persona sa bon con ta funciona cu e aparato.

   Diripiente un empleado a bin cu un teblachi yena di lechuga, y a zwaai y benta esaki den e baki di sushi.  Mesora e aparato a identifica nan tur como “lettuce”, y a uza e balans y registra cuanto gram esaki ta.  Despues e aparato ta cla pa ricibi e siguiente teblachi di desperdicio.

   Na final di sea shift di trabao, of na final di dia, personal di F&B y e Chef ta haya un rapport detaya di cuanto kilo di desperdicio a wordo benta afo, e ta menciona esaki tambe den cuanto Florin a wordo benta afo asina, y mesora por haya sa si acaso e dia ey a benta hopi batata hasa afo, y cu turistanan a come mas awacati of lechuga, etc.  E ta yuda cushina e ora evita di haci demasiado sobre-produccion di cierto alimento, pa asina nan spaar placa y materia prima.

   E sistema e ora ta yuda personal di F&B di Cushina haci mihor bestelling pa simannan venidero, pasobra awor ya nan sa kico ta tur loke a wordo benta afo.  Si hopi french fries ta ser benta afo, nan sa cu ta bay haci menos pedido di batata.

   Jareth Vermeulen a splica cu tur tres resort di Iberostar na isla di Jamaica ta haciendo uzo pa basta tempo caba di e mashin di A.I. aki, y te cu awor el a yuda e resortnan aki spaar riba di 1.3 miyon Dollar na compras, esta ‘Food Costs’.

   Pues e mashin di A.I. no ta djis bay yuda JOIA by Iberostar reduci solamente  desperdicio, pero tambe na compra pasobra e data ta feed, no solamente pa e chefnan, pero pa nan purchasing officer, pa wak kico nan tin cu cumpra, den e actual trend di demandanan pa alimento.

   Training intensivo: E empleadonan a haya e training cu ta wordo duna constantemente, y asina mes JOIA by Iberostar ta keda duna training. Otro cos importante ta cu e empleadonan ta separa e liquido.  Pues pa nan tin un conteo real di loke nan ta genera di food waste,  tin cu separa e líquido.  Pues ora cu waiter ta trece resto di soppi di un cliente, nan tin di filtra esaki, anto e líquido ta keda abao, e cuminda ta keda ariba, y nan ta tira e cuminda den e baki, pa asina e mashin di A.I. por analisa esey.

   Stefany di Departamento 3R no a djis duna training na empleadonan di Iberostar, el a bay duna training tambe na Marriott Aruba cu awor tambe tin e mashin di A.I. aki.