Pa por crea futuro mester conoce e desaroyonan den pasado --- *Un sistema unico di pago di trahadornan ta keda problema pa pais --- *Tur pago hasta pa gastonan pa biahe mester ta adapta na realidad
ORANJESTAD (AAN) — E problemanan mas grandi cu Aruba tin riba tereno di reforma di e pais, ta con ta atende cu e pago di personal, den cual ta inclui pago na tur instancia cu directamente of indirectamente ta gobierno, incluso pues companianan di Estado cu ta wordo dirigi directamente of indirectamente dor di gobernantenan politico.
Den bida tur cos tin su limite. Ta yega un momento cu, pa por sigui cana bay dilanti, mester ahusta.
Na diferente momento den historia di Aruba, gobernacion y e forma cu tabata paga trahadornan di e aparato gubernamental, a cambia.
E sistema cu ta regla trabou y pago pa trabou den Gobierno a wordo hereda di e tempo colonial, manera na tanto ocasion DIARIO ya a trece dilanti.
Un structura complica a bira realidad di pago di trahadornan di Gobierno basa riba e reglanan colonial Hulandes, despues cu bandera Hulandes a wordo planta na Aruba.
Ora Antia Hulandes a bira realidad, e sistema Antiano a wordo introduci pa pago di servicionan y departamentonan di Aruba como parti di Antia y pa Teritorio Insular di Aruba y finalmente pa pais Aruba.
Un structura complica, completamente diferente na e structura di empresa priva, ta base di pago salarial pa e trahadornan di Gobierno, heredero pues di e sistema di pago colonial cu mester a tene consideracion cu mayoria di trahadornan, sigur den e rangonan mas halto, tabata bini di Hulanda of Curacao.
Cu e sistema di pago di trahadornan di Gobierno mester a diferencia di empresa priva, ta un hecho pa e motibo cu e mester sigura trahadornan den Gobierno, cu ta un aparato politico, cu nan bienestar ta sigura aunke e politiconan na mando no ta nan partido politico.
E dirigentenan di e departamentonan mester tabata figuranan cu ta abstene nan mes di politica partidista, loke ta diferente for di e sistema di Merca por ehempel, caminda cambio di un Presidente, ta trece cambio den e maneho pero tambe di dirigentenan di su team di maneho, cu ta baha ora e baha.
E formula ideal pa trabou den gobierno ainda mester wordo inventa.
Cu e formula na Aruba mester di adaptacion sigur ta algo cu mester acepta.
E hecho si den un posicion habri un partido politico na mando por pone un experto reconoci cu ta abiertamente sostenedor di su partido, no por ta un factor decisivo debi cu den empresanan priva, ta propietarionan ta dicidi kende ta maneha nan negoshi.
Pero e experto cu wordo nombra na cualkier posicion den Gobierno, pasobra tur posicion tin nan experto pa por haci e trabou, mester sigui e maneho di Gobierno y personal di Gobierno pues mester ricibi salarionan cu Pueblo por paga.
E salarionan cu Pueblo mester paga su aparato gubernamental ta bini di placa di belasting di tur trahador cu di acuerdo cu nan entrada mester paga belasting.
DIARIO nunca a limita su mes na atende solamente e placa cu Pueblo ta paga na loke kier yama “personal di Gobierno y di companianan di Estado”.
Miembronan di e aparato gubernamental y di Parlamento, tambe ta wordo paga cu placa di Pueblo y nan tambe mester cualifica y evita cu nan ta crea gastonan pa Pueblo.
Den e ramo aki nos mester bay contra e cantidad di biahenan cu ta wordo haci cu placa di Pueblo dor di gruponan di Parlamento y di aparato gubernamental. Delegacionnan pisa di Parlamento pa cada reunion cu surgi, mientras e resultado pa Pueblo di Aruba ta keda desconoci, mester wordo geschrap awor.
Mester revisa loke ta pasa pa gastonan cu no sikiera ta conoci pa Pueblo pa asina por reforma.
E sistema colonial y di gastonan cu ta cubri den seno di e aparato gubernamental mester cambia na caminda pa un futuro nobo, den cual e concepto mas importante di “gobierno di Pueblo”, ta bira realidad.
