Sinterklaas y Pietnan di color a yega Aruba!

ORANJESTAD (AAN):  Di basta trempan muchanan hunto cu nan mayornan tabata wardando ansiosamente e yegada di Sinterklaas y Pietnan di color na porta di Harbour Arena.

Minister di Cultura Xiomara Maduro tabata presente pa duna Sinterklaas y su Pietnan bonbini na Aruba.

  Entre e muchanan por a mira caranan contento, specialmente di muchanan cu sa cu nan a comporta nan mes bon, pero tambe tabatin muchanan un tiki spanta, cu a priminti cu nan lo comporta nan mes miho. 

    E parada di Sinterklaas y Pietnan a sali for di Harbour Arena pa termina riba Plaza Padu. Comision Celebracion Dianan Nacional a percura pa e parada wordo acompaña pa Quality Brassband, Truck cu Coro di Muchanan Sabi bou direccion di Edselyn Figaroa.

   Pa haci e celebracion di yegada di Sinterklaas y Pietnan di color mas special, riba Plaza Padu, “Tan Tio”, forma pa Tanchi Esmee y Tio George a entrene publico cu show, baile y wega.