Sindicatonan a bolbe subi caya desapunta cu e carta di Knops pa gobierno di Aruba

ORANJESTAD (AAN) – Diahuebs mainta, sindicatonan cu ta representa empleadonan publico, a bolbe sali caya mustra nan descontento, pasobra nan ta sinti cu gobierno no tin intencion di reembolsa e 12.6% di nan salario.

            Sindicalistanan ta splica cu gobierno a manda nan un carta unda ta bisa nan cu nan a tuma consulta cu Hulanda, pa trata e tema di e 12.6% pero loke Knops a duna como contesta, ta mustra cu dia 22 di November gobierno di Aruba a pidi pa cuminza baha e 12.6% aki, y  ningun momento nan ta bisa Knops pa elimina e medida aki por completo, pero nan a pidi pa sigui kite.

            Dia 8 di December gobierno a manda carta atrobe pero no ta skirbi den dje loke nan ta bisa e sindicatonan. Sindicalistanan ta bisa cu gobierno a pidi nan, dia 13 di December, tempo di 2 biaha 24 ora, pero den e lapso aki nan no a haci net nada.

            E carta cu nan a ricibi di Hulanda ta contestando e carta di gobierno, di 8 di December. Sindicalistanan ta sinti cu gobierno ta usando nan, haci nan perde nan tempo, mientras cu no tin ningun intencion di kita e 12.6 full pasobra e ora ey Secretario di Estado Knops lo a contesta cu el a tuma nota di e carta unda gobierno ta pidi pa elimina e 12.6 aki. Pero loke Knops ta bisa den su carta ta cu el a tuma nota di e carta di gobierno unda ta bisa cu lo cuminza baha e 12.6%.

            E sindicatonan ta pidi pa no laga gobierno sigui gaña nan, y loke ta wordo bisa den conferencia di prensa no ta cuadra cu berdad, y en realidad e ta un falta di respet y abuso pa wak con gobierno actualmente, unico cos cu kier cu e 12.6% ta use como garantia pa sigui haya placa, pasobra Hulanda mes ta bisa cu no tin necesidad pa duna Aruba mas sosten financiero.

            A tuma nota cu nan no ta pidi ayudo pa e aña aki mas pero pa 2022, y nan ta disgusta di wak con gobierno ta bin den conferencia di prensa bisa cu nan ta sinti pa e trahadornan publico, cu nan ta compronde e lucha y ta apoya nan den esaki. Pero e carta di Knops ta mustra cu gobierno no ta compronde nada, nan no ta worry cu ningun hende, nan ta worry so cu nan mes.

            Mientrastanto, gobierno y parlamentarionan ta reitera cada bez na e sindicatonan pa nan sinta na mesa pa dialoga, y pa acerca Hulanda conhuntamente pa yega na un solucion aceptabel pa ambos parti.