Sindicato TOPA a afilia na PSI Region Caribe

ORANJESTAD (AAN):  Sindicato TOPA a organisa un mainta di informacion y relaciona cu esaki, Rene Bernabela a indica cu e biaha aki nan a invita Roland Ignacio di Corsow,

representante di PSI pa e region di Caribe pa e por duna e miembronan y delegadonan di Sindicato TOPA un presentacion pa locual ta PSI.

E motibo di esaki tabata pasobra antes TOPA tabata participe pa locual ta PSI Region Andino pero mirando e hecho cu locual ta e diferencia di cultura, lenguahe y informacionnan necesario, Sindicato TOPA a dicidi di afilia na PSI Region Caribe,

Ignacio a sigui bisa cu su presencia na Aruba tambe ta den cuadro di e congreso extraordinario di TOPA unda durante di esey a pidi pa e afiliacion cu nan kier na PSI di Caribe.

Antes, e organisacionnan di Aruba, Corsow y Bonaire tabata afilia na Organisacionnan Latinoamericano y di Caribe y via di nan tabata tin acceso na e organisacionnan internacional di trahador, a señala.

PSI Caribe ta un di e sub regionnan. Tin e regionnan di Africa, Asia, Europa, America y Latinoamerica. Den e cuadro aki a dividi nan tambe den sub region. E sub region di Caribe ta enfoca gran parti riba e islanan y e sub region andino ta esun cu ta atende cu America Central y Suramerica tambe, Ignacio a bisa.

E situacion den Caribe ta diferente for di e realidad di paisnan grandi den e continente americano. Esaki ta pone cu e politica cu ta wordo hiba den e sub region no necesariamente ta esun cu ta bin na prome lugar na e islanan chikito, a remarca.

Den e cuadro ey tabata tin algun sesion unda enfoca riba algun punto strategico, entre nan logra un participacion igualitario di hende muher.

 Rene Bernabela a confirma cu nan a dicidi di afilia na PSI Region Caribe caminda nan lo haya asistencia cu diferente training ta momento cu ta rekeri esaki.