Gregorio Wolff y Michiel Croes:
ORANJESTAD (AAN): Tanto Gregorio Wolff y Michiel Croes di C.A.P.A., a splica cu e informacion cu nan tin ta cu desde 2014 e directiva eligi den congreso 2013 ya no a funciona optimalmente. Ora bo lesa e revistanan di SEPPA na final di aña 2016 te cu 2019, bo no ta lesa cu tabatin eleccion pa un directiva.
Despues di 2019 no tin informacionnan di fin di aña. Solamente den prensa ta sali invitacion pa e brindis/fiesta di fin di aña. E revistanan ta papia cada biaha cu no tin candidatonan pa eleccion di directiva. Otro biaha e directiva cu no ta existi no a percura pa candidatonan y otro storianan cu no tin candidato. Lubidando cu ta trabao di Comite Ehecutivo (Secretario General) pa ehecuta e trabaonan aki. P.e. door di saca informacionnan pa informa miembronan cu ta bay tene eleccion, ta busca candidatonan. Ta bisa ki dia e eleccion ta y kendenan ta candidato. Nada no a sosode.
Despues di 2019, miembronan no a ricibi revista mas. Pues lesando e revistanan di final di aña, for di 2013 no tabatin eleccion mas. Akinan e rabo di porco ta krul. Con a para cu e decharge-nan, cu eleccionnan?
Aki Wolff y Croes a dicidi na yam’e den un forma bunita, SEPPA tin un deficiencia democratico cu nifica falta di democracia, sigur despues di 2016.
Falta di democracia ta haci cu no tin control ariba e maneho di Comite Ehecutivo. Y esey ta algo hopi mahos!
Comparacion di e parlamentario de Meza kende ta haci trabaonan di ministro, cu e directiva di SEPPA (spiritu) cu ta ehecuta trabaonan di Comite Ehecutivo.
Ora nos haci comparacion cu gobernacion na Aruba awor aki nos ta wak un bon comparacion.
- de Meza, parlamentario segun e líder di e partido berde den gobernacion y di otro lidernan di e partido aki ta bisa cu awor ta e parlamentario M. de Meza ta bay ehecuta e trabaonan di e ministerio di Infrastructura, di Medio Ambiente y di Energia, cu parlamento a designa na Baba Herde, un persona cu estudio Universitario. Pues na Aruba no tin Trias Politica mas.
Mesun cos nos ta lesa for di e revistanan di SEPPA, varios aña tras di otro, cu no a haya e candidatonan pa directiva, awor nos ta lesa den Diario di 11 juli 2025, cu directiva ta bay den ehecucion di trabaonan hunto cu Comite Ehecutivo. Ay no, ay no, Aruba Quo Vadis? Parce cu e miembronan di directiva di CAPA a suspende “COMMON SENSE”.
Pa loke ta e caso cu Comision 11 a gana den corte, un hurista cu a worde saca for di orden di Abogadonan a bisa comision 11 cu directiva di CAPA ta bay cu e caso na Corte di Apelacion. Nos ta haya e siguiente situacion:
Den statutonan di CAPA ta poni cu directiva mester duna comision 11 e registro di miembronan;
Jues den prome instancia a dicta cu directiva di CAPA mester duna Comision 11 e registo di miembronan;
Den e ley cu ta para e reglanan concerniendo Asosacionnan di Cooperativismo na Aruba AB 1987 no. GT 8, bao articulo 11 tin mesun stipulacion cu Statutonan di CAPA. Pues, segun e ley aki tambe ta dicta cu directiva di CAPA mester duna Comision 11 e registro di miembronan.
Directiva di CAPA no tin ningun chens di gana e caso den Corte di Apelacion. E tres puntonan menciona prome ta indica cu e miembronan di Directiva di CAPA no por pensa normal mas, nan no tin “Common Sense”. E registro di miembronan ta pa comision 11 tin nomber, adres y email di miembronan, pa nan firma e peticion na directiva di CAPA pa tene un reunion general pa duna informacionnan ariba e ladronicia di 382.000 Florin.
Manipula pa no entrega e registro di miembronan ta pone tur hende cu “dosplaca di tino” pensa, cu Tesorero M. Brito y directiva di CAPA tin cosnan scondi y ta sigui tarda e entrega. E hurista sigur lo worde bon paga y e tesorero lo bisa cu e placa no ta Sali for di su saco, pero for di e cuentanan di miembronan di CAPA. Cu e ley, AB 1987 no. GT 8, den su articulo 21; lid a, ta bisa cu Violacion di e ley aki ta un sorto di delito cometi door di dirigentenan di un Cooperativa. Den e caso aki, e miembronan di directiva di CAPA, por worde castiga cu un multa si nan no cumpli cu e entrega di e registro di miembronan. Esaki sigur lo bira un peticion di comision 11 na Corte di Apelacion pa castiga e miembronan di directiva di CAPA, durante e tratamento di e caso di apelacion.
Comision special: Aki ta papia di Comision pa Restaura Democracia den SEPPA, C.R.D.S. Teniendo cuenta cu tur e desviacionnan di e secretario General di SEPPA, e baymento tras di SEPPA, si nos tuma na consideracion: (*) No tin un bon maneho di acuerdo cu e codigo di bon Gobernacion/administracion. (*) Tin un deficiencia grandi di democracia. (*) No ta respeta pa statutonan. (*) Hopi aña, no tin directiva, pues no tin control ariba e maneho di Comite Ehecutivo. (*) Hopi aña, no tin control ariba e finanzas di SEPPA y no tin Decharge duna.
Pues e maneho di e Secretario General actual ta hibando SEPPA atras, dia pa dia. Sigur e tin e apoyo di + 5% di miembronan, su hendenan ront di dje. Pero e mayoria aplastante, cu ta miembronan conciente y cu ta pensa ta pidiendo cambio grandi den SEPPA.
Miembronan conciente di SEPPA a lanta un comision: Comision pa Restaura Democracia den SEPPA, C.R.D.S. Ora e temporada di vacacion pasa, e campaña ta bay start.
