ORANJESTAD (AAN): ELMAR, como compania local cu ta celebra su 75 aniversario durante 2025,
ta orguyoso di anuncia cu e ta Patrocinador Principal di Festival Cantica di Caya, un evento cultural cu ta forma parti di e celebracionan di Dia di Brazil, organisa pa Fundacion Chico Harms. Festival Cantica di Caya lo tuma luga riba diabierna 25 y diasabra 26 di juli 2025 na Centro di Bario Brazil.
E festival ta un evento pa celebra nos herencia cultural cu un proposito fundamental: crea un incentivo y plataforma pa nos musiconan compone y presenta musica crioyo nobo. E festival ta e momento clave den e calendario pa estrena e musica cu lo domina nos cayanan durante e paradanan cultural: Parada cu Lanterna y Parada Folklore Cultural, cual ta tuma luga tur aña den e prome weekend di september.
Cu e contribucion aki, ELMAR ta yuda pa sostene un plataforma cu ta inspira creatividad, promove talento local y stimula orguyo cultural. Stimula y mantene nos cultura ta un componente esencial di e programa di Corporate Social Responsibility (CSR) di ELMAR.
ELMAR ta invita tur hende pa bin goza di e bon ambiente cultural di Festival Cantica di Caya. Laga nos canta, baila y apoya na nos talento Arubano cu ta sigui crea musica nobo pa domina cayanan.
Nos ta desea henter comunidad un celebracion dushi, sano y sigur. Sinti e Energia di nos cultura cu ta bira realidad na Festival Cantica di Caya!
