Sindicato FTA y Holiday Inn a cera CAO pa un periodo di tres aña

ORANJESTAD (AAN):   Sindicato FTA y Holiday Inn Hotel a cera un contrato colectivo. Relaciona cu esaki, Simone Farci, Gerente General di e hotel a indica cu como compania nan ta hopi contento.

Tabata un negociacion largo y na final a yega na un hopi bon acuerdo.

Mester a considera hopi aspecto pa por a yega na un decision final, Farci a señala. Ta saliendo for di un periodo di pandemia y no tabata facil pa su coleganan como pa e compania.

Aworaki e reto tabata pasa door di e efectonan di omicron cual a afecta hopi durante e kwartaal aki. Nan ta mira pa futuro riba loke ta un bon temporada di zomer pa asina por alcansa e nivelnan bek di 2019, a remarca.

Hose Figaroa, Presidente di FTA a manifesta cu nan ta hopi contento cu e logro di e negociacion di e CAO aki.  No semper e negociacion tabata facil, pero apesar cu tabata tin momentonan unda cu e partidonan y e situacion a pega un poco, nan a sa di sali afo den un forma exitoso.

Ta un contrato colectivo cu ta conta cu aprobacion di e miembresia completo y sigur di e directiva di FTA

Figaroa a bisa cu ta interesante pa menciona cu FTA y Holiday Inn tin un relacion di hopi aña. Mas di 50 aña di CAO cu ta wordo firma entre e organisacionnan aki. FTA ta hopi contento di por continua e bon relacion aki cerando un CAO cu ta satisfactorio y na beneficio di tur esnan envolvi. 

Vicepresidente di FTA Rudy Geerman a expresa cu den dos ocasion, e trahadornan a rechaza locual a wordo negocia. Na final a logra toch. Ta un CAO di 3 aña. Tin un 8% di aumento pa wordo reparti den 3 aña.

Banda di esaki a mehora algun beneficio caminda cu e managernan cu tambe tabata den e 15% di un sistema di 'service charge' cu ta wordo uza na e hotelnan, y e manager tambe ta wordo paga for di e pot ey.

Den e caso aki a logra convence gerencia pa e compania paga e manager y no sak'e for di e pot pa asina e trahador por haya un tiki mas placa, Geerman a indica.

Tambe tin mehoracion pa loke ta e condicion den e area di 'Housekeeping'. Akinan  tabata tin un condicion cu no ta tur hotel caminda tabata depende di mas aña di servicio pa por haya un tiki mas di aumento. Akinan tambe a logra haya un mehoracion.

Pa FTA, e di mas importante ta e siguransa y confiansa cu gerencia tin den su producto y asina bay den un CAO di tres aña. Esaki pa e trahador ta significa tambe stabilidad caminda cu nan condicion ta mara pa e proximo tres añanan.

Na final, e partidonan a procede na firma e CAO.