SIMAR kier stroba mayornan y gobierno yamando e docentenan pa un reunion

Dialuna mainta meymey di e lesnan a convoca reunion --- ORANJESTAD (AAN):  Presidente di Sindicato di Maestronan (SIMAR),

Josephine Albertus parce ta un di esnan cu no ta keda keto cu instigacion di e maestronan pa sali acudi un reunion meymey di un dialuna unda cu e studiantenan mester ta den les.

Awor kier yama un reunion extraordinario, pero no despues di scol, pero si den oranan di scol. Den un audio dirigi na esnan den veld di enseñansa a haci un yamando pa acudi durante 2 ora na un reunion extraordinario na cual el a bisa, e docentenan tin derecho pa bay un reunion di nan sindicato cu a wordo yama.

El a bisa cu despues di e reunion nan lo dicidi kico nan lo sigui haci. SETAR tambe ta bay sali 2 ora, WEB probablemente tambe y pesey SIMAR tambe ta bay un reunion durante 2 ora.

Locual ta mas cuestionabel den esaki ta cu e sindicalista ta yama e reunion aki den oranan di mainta, di 8 am pa 10 am. El a laga sa cu si ta yama e reunion atardi no lo haci un diferencia. Pero si ta yame mainta e ta haci un diferencia pasobra "e ora ey ta stroba mayornan, anto esey ta stroba gobierno".

Mesora, atardi, ora cu e audio cu a circula a bira conoci, DIARIO a haya diferente reaccion di mayornan cu a considera e asunto aki uno hopi iresponsabel y cu ta e unico resultado lo ta perhudica e studiantenan cu lo keda sin haya les durante dos ora.

"Esaki ta e docentenan cu ta educando nos yiu? Strobando e mayornan?". "Esaki ta un idea maligno", asina algun mayor a expresa.

Den un carta, SIMAR ta informa Minister di Enseñansa Endy Croes di e reunion y cu esaki lo ta den cuadro di e discusion cu ta existi rond di e 12,6% di recorte di salario di e empleadonan publico.