Señora Swinda Dumfries di DVG:
ORANJESTAD (AAN): Scol Saludabel Aruba ta un programa integral cu ta promove salud y bienestar den scolnan di Aruba. E iniciativa ta enfoca riba alimentacion saludabel, movimiento, salud mental, salud social y emocional, y un ambiente sigur pa tur mucha. Door di educacion y colaboracion, e programa ta yuda scolnan forma muchanan pa nan crece mas fuerte, feliz y consciente.
Parti di Scol Saludabel ta e iniciativa ‘Siman Saludabel’, na unda cu ta trata diferente tema manera alimentacion saludabel, deporte, movimiento, bienestar social y emocional, siguridad, naturalesa y medio ambiente.
Señora Swinda Dumfries di DVG, den un entrevista cu DIARIO, a splica cu durante e siman cu a pasa, nan a scoge pa pone enfasis riba salud mental di muchanan cu e tema ‘Forsa Mental y Progreso Mental’. Scolnan participante por uza a e temanan menciona pa organiza diferente actividadnan cu tin como meta pa reenforsa e bienestar mental, social y emocional di tur mucha.
Señora Dumfries a enfatisa cu e base di salud y bienestar fisico y mental di un persona ta hopi importante. Segun e, ora muchanan ta siña for di edad hoben con pa biba saludabel, move suficiente, come bon, trata otro cu respet y maneha emocionnan, y nan ta wordo guia y motiva den esakinan, nan tin un mihor oportunidad pa crece bon. Na esaki, mayornan, scolnan, trahadonan social, IBiSA, Gobierno y comunidad en general, tur por contribui pa forma muchanan saludabel y, como resultado, un Aruba mas saludabel.
