Mente riba AI: E poder di un mente informa
ORANJESTAD (AAN): Durante e siman di 24 pa 31 di october, mundo ta observa ‘Media and Information Literacy in Digital Spaces 2025”. Den un mundo unda inteligencia artificial ta creando titularnan mundialmente, mehora noticia, y ta influencia opinion, e mensahe di e siman di conscientisacion di e aña aki ta mas cla y mas fuerte cu nunca, Mente Riba Ai. UNESCO ta invita tur pais, grandi y chikito, pa refleha riba e poder di e mente humano den un mundo cu ta automatisando hopi lihe.
Pa Aruba, e tema global aki tin un peso special. Nos isla tin un cultura unico na unda cu storia ta wordo conta den veranda na cas, den banki na scol, na trabounan, den festivalnan di canto, den poeisianan, entre otro. Tur esakinan ta forma nos historia. Pero awor, den e era digital aki, unda algoritmo ta dicidi kico nos ta mira prome cu nos mes ta busca, e responsabilidad pa compronde, duda, y verifica informacion ta bira un deber di cada ciudadano.
E mente prome cu e mashin: Mente riba AI (“Minds Over AI”) ta recorda nos cu mientras Inteligencia Artificial por asisti nos, e no por reemplasa nos capasidad pa pensa, rasona y sinti. E habilidad pa lesa, pensa y comprende, ta e compas cu ta nabega e lama digital nobo aki. E ta siña nos pa cuestiona fuentenan di informacion, desafia engaño y mal intencionnan, y ta busca e berdad mas leu di aparencia atractivo di contenido viral.
Den un comunidad chikito y cera manera Aruba, desinformacion por core mas lihe cu biento. Pero e berdad tambe por core mesun like, si nos pueblo ta informa, alerta, y consciente. E habilidad pa lesa, pensa y comprende ta duna poder na cada ciudadano pa no solomente uza informacion, sino pa ta creador di informacion digno di confiansa, pa forma un cultura di brinda informacion basa riba respet, claridad y autentico.
Un Isla contado di storia den un era digital: For di sabiduria, conta den storia inspirativo y creativo, di nos mayoranan, te na bosnan online di nos hobennan, Aruba semper tawata orguyoso di su rikesa den comunicacion. E era digital no mester ‘gum’ esey. Mas bien, e por amplia esey, si nos ta uz’e cu responsabilidad. Si nos ta siña nos mes y nos yiunan pa analisa contenido crea pa AI, si nos profesionalnan por reconoce noticia falso, y si nos ta inspira famianan pa papia di kico nan ta lesa y comparti, nos ta sigura cu tecnologia ta sirbi nos humanidad y no ta manda riba dje.
Un yamada pa ta consciente: Durante e siman di ‘Minds Over AI: Media and Information Literacy in Digital Spaces 2025’, laga nos refleha nos rol den e paisahe di informacion cu ta keda evoluciona. Laga nos ta alerta y envolucra sin cansa di lesa, pensa, analisa, comprende y comparti loke ta berdad y no loke ta falso. Aruba su beyesa no ta consisti den su paisahenan bunita. Nos ta un comunidad cu un mente soberano, fuerte, resistente y sin miedo di e berdad. Pasobra na final, no ta tecnologia ta loke ta defini progreso, sino sabiduria. Y sabidura ta cuminsa ora mente ta prome cu mashin, Mente riba AI.
