Tin di sigui actua pa combati e pisca invasivo aki
- Evento ta cuminza Diabierna 7 di November y finaliza 16 November
- Tur sambuyado lo ricibi pago pa nan Lionfish
ORANJESTAD (AAN): E dolor di cabes di siglo nobo na Aruba, sin duda ta e presencia di e especie invasivo yama Lionfish cu a plama den henter Caribe y ta destruyendo na forma acelera, tur demas pisca cu nan por come bao lama. Asina monton di pisca chikito cu ta biba rond di coral ta desapareciendo.
Den pasado na numeroso ocasion a splica con e pisca Lionfish aki, cu ta endemico di area di Indopacifico (Indonesia y Australia), a logra yega den hemisferio occidental danki na colectornan cu kier a pone nan den aquarium, pero algo a bay malo y e piscanan aki a resulta den Lama Caribe y awor nan ta multiplicando sin stop, y destruyendo habitat di hopi pisca rond di e islanan. Lionfish den Caribe tin ningun enemigo, excepto e ser humano.
Unico manera cu por destrui Lionfish tabata cu harpun, pero pa colmo na diferente isla esaki tabata prohibi. Cu yudansa di Gobierno den pasado, a yuda suavisa regla pa asina humanidad haya tiki ventaha den e guera contra e animalnan aki. Aunke ainda no tin mucho claridad riba e legalidad di uzo di harpun y speargun, y piscadonan ta ancioso pa haya claridad riba e asunto.
Diripiente a descubri cu e Lionfish ta dushi pa come, y esaki a pone cu mas hende a cuminza yuda captura nan, pero keto bay e pisca invasivo aki ta sigui cosecha mas y mas tereno.
Na Paradera tin un negoshi cu periodicamente ta habri pa ofrece Lionfish na benta pa pueblo purba. Y el a bira popular hasta cerca turistanana.
Den fin di siman na e Lion Fish Snack aki, e propietario Patrick van Brakel hunto cu e piscado Jair Britten, a convoca un conferencia di prensa unda nan a lanza e informe, cu otro siman nan lo tin un otro Torneo di Lionfish. Esaki tin di wordo haci, como cu e poblacion submarino di e pisca a aumenta barbaramente.
Un Captain’s Meeting: E Torneo ta wordo organiza hunto cu Centro di Pesca Hadicurari. Jair Britten a indica cu nan ta acercando piscadonan local debi cu nan meta ta pa haya mas hende den awa cu harpun pa bay captura nan. Alavez ta yuda concientiza comunidad riba e presencia di Lionfish keto bay den awa di Aruba.
Torneo ta start Diabierna 7 di November 2025, y lo finaliza Diadomingo 16 di November. Bo mag di pisca den tur seccion di lama rond di Aruba, incluyendo den areanan cubri door di Parke Nacional Arikok.
Prome cu e Torneo start, tuma nota cu lo tin un Captain’s Meeting riba Diahuebs 6 di November 2025 pa 6:00 pm te 8:00 pm na MFA Santa Cruz. Aki lo suministra detayenan importante di e reglanan di Torneo. E mesun anochi por inscribi. Participantenan cu kier uni cu e Torneo, tin di paga 50 Florin pa inscripcion.
Jair Britten a splica cu e Torneo aki ta hinca den otro, den sentido cu lo bay premia esun cu drenta cu mayor kilahe. E biaha aki e piscado masculino cu a captura mas, lo wordo corona como Lionfish King. E piscado femenino cu mas kilahe di Lionfish, lo wordo corona como Lionfish Queen.
Tur participante lo ricibi un UV-Resistant Longsleeve Shirt pa participa y lo ta alavez un bunita recuerdo di e Torneo.
Lo ricibi pago: Tur pisca lo wordo entrega na Lionfish Snack, unda e team ta tuma e pisca y mesora ta pisa nan, ta midi cada uno debi cu e Torneo lo tin un proposito cientifico tambe pa keda acumula data di statistica, e ubicacion unda a pisca nan, y e profundidad cu esaki a wordo haci.
Britten a haci suplica pa tur sambuyado tuma nota di esaki. Corda bon, cu tur Lionfish cu bo entrega, lo bo haya pago pa e kilahe. Pues abo como sambuyado lo no sali perdi, ya cu bo lo ricibi 25 Florin pa kilo. Pues tur dia cu e sambuyado sali, e lo bin bek ‘cu ganashi’, pasobra e lo no tin perdida.
Premionan atractivo: Tin diferente patriconador cu ta dunando un man pa presenta premio atractivo pa e ganador-, y finalistanan. E ultimo dia lo bay ta riba De Palm Island, unda famia ta invita pa tira Lionfish rond di e isla.
Pues ademas di haya placa pa e Lionfish, bo ta ricibi premio tambe. Tambe lo tin premio pa e sambuyado cu traha un video tambe di e capturanan, cu bunita editing, lo por gana.
Ta sperando cu Aruba Tourism Authority lo patrocina cu premio tambe. Varios establecimento, incluyendo JOIA Aruba by Iberostar a duna cena pa dos persona, etc.
E Torneo ta habri pa adulto, considerando e hecho cu jaagmento bao awa ta un acercamento mas intenso cu ta rekeri cierto nivel di responsabilidad pa cada sambuyado. Pesey lo no acepta mucha pa participa den esaki.
