Thomas Ruiz di VRA ta opina
ORANJESTAD (AAN)— Señor Thomas Ruiz, Secretario di VRA, a haya e pregunta di DIARIO, durante e entrevista aki, cual ta e stakeholders cu tin di haber cu trafico na Aruba.
Ruiz a contesta cu ta trata di Directie Onderwijs, Wetgeving, DOW, Ministerio do Husticia, DTI, Ministerio di Transporte (Minister Ursell Arends), KPA, Departamento di Examen, scolnan y companianan di seguro.
El a subraya cu e problema ta cuminza for di scol basico caba y tambe for di Instituto Pedagogico Arubano (IPA), cu no tin ningun docente di trafico cu ta prepara e docentenan cu ta duna les na alumnonan di vijfde klas na scolnan basico. “Kiermen, basta stakeholders tin cu tin di haber trafico” el a remarca.
Pa loke ta trata e rol di Parlamento den e problema di trafico, Thomas Ruiz ta puntra cuanto biaha prensa a tende Parlamento papia algo di e problematica di trafico? Di accidentenan den trafico? Di e consumo excesivo di alcohol. Tin un Comision Central, pero Ruiz ta puntra kico e ta bezig cune? Kico nan plan ta? Pueblo no ta tende nada. Pero tampoco e por keda na e Comision aki so, tin 21 Parlamentario.
“Kico nan mes ta bezig cune? Kio nan plan ta? Kico nan ta warda? Siete morto den trafico nos tin caba e aña aki, si mi no ta hera. Pa mi, e prome morto caba ta demasiado. Nos tin cu busca un manera pa evita esaki mas tanto posible. Y mi a bisa varios biaha caba cu esaki por afecta nos economia, cu ta nos pilar turistico. E ta algo hopi peligroso den sentido cu e por afecta e pilar economico di nos pais”, Thomas Ruiz a señala. El a subraya tambe cu tin hopi politico pafo di Parlamento, anto kico nan ta pensa di e asunto aki? Thomas a enfatiza cu na Aruba ta spera pa e baca hoga pa busca solucion.
