SICA ta ricibi reconocemento special durante conferencia internacional na Nairobi

ORANJESTAD (AAN): Soroptimist International Club Aruba (SICA) a ricibi un reconocemento di agradecimento y

aprecio for di presidente di Soroptimist International Africa Federation (SIAF), señora Mary Muia, durante e di cuater Conferencia Bienal na Nairobi, Kenya. Señora Nora Eleonora, representante di SICA, a acepta e reconocemento den nomber di e club.

   Di 25 pa 27 di september 2026, Nairobi tabata sede di e di cuater Conferencia Bienal y Asamblea General Anual di SIAF. Bou di e tema “Leading the Way: To Empowerment & Sustainability in Africa & Beyond”, e encuentro a reuni miembronan y representantenan pa intercambia conocemento y experiencia tocante liderazgo, empoderamento y sostenibilidad pa hende muhe y mucha muhe.

   E programa a inclui charlanan, panelnan y sesionnan dedica na salud, educacion, derechonan y oportunidadnan economico. Tambe tabatin espacio pa comparti bon practicanan, fortalece colaboracion internacional y evalua e prioridadnan di e federacion, cu e obhetivo di promove igualdad y desaroyo sostenibel.

   Aruba tabata e unico pais no Africano cu a ricibi e reconocemento aki. Otro paisnan representa, entre nan Hulanda, Noruega, Spaña, Merca y Inglatera, no a ricibi e distincion, loke ta haci e ocasion aki particularmente significativo pa SICA y su miembronan.

   Pa SICA, e reconocemento ta mas cu un motibo di orguyo: e ta un expresion di aprecio internacional cu ta destaca e club di Aruba dentro di e movimiento mundial di Soroptimist. E distincion ta fortalece e compromiso di su miembronan y ta inspira nan pa sigui amplia e impacto di nan trabao na bienestar, derechonan y empoderamento di hende muhe y mucha muhe.

   SICA traha na bienestar di hende muhe y mucha muhe y na conscientisacion tocante nan derechonan y e desafionan cu nan ta enfrenta. Ciudadanonan cu kier uni na e club, por tuma contacto via pagina di Facebook pa mas informacion. Cu participacion y compromiso di mas miembro, e club por sigui contribui na un Aruba cu mas igualdad, dignidad y oportunidad.