SICA ta habri su portanan pa mas hende muhe forma parti di su mision

ORANJESTAD (AAN): Soroptimist International Club Aruba (SICA) a organisa un mainta informativo na EduCampus,

cu e meta di duna damanan interesa e oportunidad pa conoce e organisacion mas di cerca y descubri con nan por forma parti di su mision pa empodera mucha muhe y hende muhe den nos comunidad. 

Durante e encuentro, e damanan presente a haya e oportunidad pa intercambia ideanan cu miembronan di SICA y conoce mas tocante e vision, mision y diferente proyecto cu e club ta desaroya. 

Atencion special a wordo dedica na e trabou cu SICA ta realisa pa conscientisa mucha muhe y hende muhe tocante nan derechonan, crea mas oportunidad pa nan desaroyo y promove nan bienestar. Tambe a wordo destaca e rol di Soroptimist como un organisacion cu ta aboga pa derechonan di hende muhe, tanto na nivel local como internacional. 

E encuentro a transcuri den un ambiente ameno y positivo, cu espacio pa pregunta, comparti experiencia y explora e posibilidadnan pa contribui activamente na comunidad. E mainta informativo por wordo considera uno fructifero, mirando cu algun di e damanan presente a expresa nan interes pa eventualmente bira miembro di SICA. 

SICA ta enfatisa cu e invitacion pa forma parti di e organisacion ta keda habri. Damanan cu ta interesa pa conoce mas tocante e club, su actividadnan of e proceso pa bira miembro, por tuma contacto cu un di su miembronan pa haya informacion adicional. 

Den e proximo periodo, SICA lo sigui activamente involucra den e programanan di Orange the World, e campaña internacional cu ta enfoca riba conscientisacion y eliminacion di violencia contra hende muhe y mucha muhe. 

Cu iniciativanan manera esaki, SICA ta reafirma su compromiso pa sigui promove igualdad, empoderamento y respeto pa derechonan di hende muhe, mientras e ta crea espacio pa mas dama contribui cu nan talento, conocemento y experiencia na desaroyo di nos comunidad. 

SICA ta invita tur dama cu ta comparti e vision aki pa uni forsa y forma parti di un organisacion cu ta traha pa un futuro cu mas oportunidad, igualdad y bienestar pa tur hende muhe y mucha muhe.