Pader Jose Miguel Nava di Instituto Kateketico:
ORANJESTAD (AAN) Pader Jose Miguel Nava, di IKDA (Instituto Kateketico Diosesano Aruba), den entrevista cu Matutino DIARIO, relaciona cu e temporada aki di Cuaresma.
Pader Nava a indica cu si nos ta haci un lectura y ta lesa e signonan di e temporada actual cu nos ta bibando, esaki ta algo normal.
“Pasobra tur e evolucionnan di e sociedad na mundo, ta bay den e mesun direccion: un Dios cu no tey mas den sociedad, cu no tey mas den famia, inclusive cu no tey mas den scolnan, un Dios cu a keda cera den structura di tempel.
Pero, si nos ta cera Dios den e structura di un tempel, nos ta lubida di Dios, nos ta lubida di nos mes! E ser humano tin un capacidad importante, y esey ta e capacidad di por mira mas leu y no keda den su confort sino semper busca supera bo mes, construi su realidadnan mas grandi, y e unico cu por yuda nos pa wak den un bon direccion, pa wak cual ta e caminda miho pa bo desaroya e miho version di bo mes, ta Dios, cu ta e unico ser perfecto, y door di nos Fe ta yuda nos pa nos por crece!” Asina Pader Nava a expresa.
