Prome Minister Mike Eman ta mustra:
ORANJESTAD (AAN)-- Den entrevista cu Matutino DIARIO, Prome Minister mr. Mike Eman, a referi na e hecho cu Gobierno di Merca a autoriza cinco di su companianan petrolero, pa opera na Venezuela.
“Esaki ta locual nos ta mira ta sosodiendo, locual ta indica un normalizacion y esey ta yuda den e evaluacion si Aruba ta habri su espacio aereo pa aerolineanan comercial, entre Aruba y Venezuela”, segun e mandatario.
Riba tereno comercial mes, e dignatario a expresa cu Venezuela ta un pais di hopi recurso, y den e momento cu den e pais dicidi cu ta bay enfoca, hunto cu otro paisnan grandi na mundo, riba un recuperacion economico, cu ta bay inverti, entre otro, den recuperacion y renovacion di nan industria di agricultura, den nan industria en general, ya cu Venezuela, ademas di petroleo, tin hopi otro diferente industria, sigur e contactonan nobo cu nan lo tin, lo por conoce un renovacion. “Nos ta mira cu e cercania di Aruba por ta un factor positivo pa nos, cu conocemento di paisnan grandi, di Merca y Hulanda, estableci na Aruba y cu for di aki lo tin un hub di conocemento e cambionan cu lo wordo introduci na Venezuela. Mi ta kere den e concepto aki, y nos ta papiando cu partners cu lo por yuda y cu lo kier cana cu nos riba un caminda asina”, Premier Mike Eman a declara.
