Edward Maduro, Presidente di SADA:
ORANJESTAD (AAN) – Lider di sindicato di Aduana, Edward Maduro, den entrevista cu Matutino DIARIO a sigui splica cu awendia no ta facil pa busca hende den un instancia unda cu tin cu eherce ley y traha warda, etc. El a señala cu e hubentud dia awendia ta wak cosnan hopi diferente compara cu esnan di dies, binti aña pasa.
“Anto, bo tin cu cuminza cambia bo strategia, con bo ta bay gana e hendenan pa aplica y pa bin eherce e funcionnan aki, cu ta pa Pais Aruba. Pero si bo no tin e vision, lamentablemente nos ta keda bay atras. Aduana awo a bay hopi atras y e ta un dienst cu ta produci hopi entrada pa gobierno, anto e ora ey bo ta bisa “e balor no tey”. Ministernan anterior a bisa cu Aduana ta un dienst hopi importante; nos ta scuchando esaki awo for di e minister, pero nos tin cu wak e accionnan. Tur por cana bisa Aduana ta importante, polis ta importante, pero si no ta inverti den nan y demostra cu enberdad, e Cuerponan aki ta importante pa e pais, anto e ora ey nos ta carga awa hib’e lama”, Edward Maduro a remarca.
Maduro a reitera cu SADA tin reunionnan programa, mensualmente, cu e minister y ta temanan cu nan ta trece dilanti constantemente. “Nos tin un lista di alomenos 40 punto, cu ta creciente, pero, atrobe nos tin cuater reunion cu nos no a logra pasa cinco punto, pasobra cada bez minister tin cu tuma un decision, e tin cu bay find out…bo kier dun’e beneficio di duda, dun’e un chens, pero nos no por duna dos, tres aña chens. Cinco luna ta bayendo di e gobernacion nobo, mester actua, mester tin e boluntad! Nos ta purba di señala e puntonan akinan, pero si na dado caso e ta drenta un orea y sali di e otro banda, no tin e baloracion mereci”, Edward Maduro a señala.
