Na 2020 na Hulanda tabata tin 1.4 Miyon trahador den cuido --- *ImSan tabata uno di e pasonan mas responsabel den cuido --- *Hospital tabata un calamidad costoso y un herencia caotico
ORANJESTAD(AAN)—Si hospital tabata pashent, e lo a muri algun aña pasa.
Esaki no ta un ponencia cu nos ta presenta awe, pero cu nos a presenta basta tempo pasa.
Semper nos a trece dilanti tambe, cu Dangui Oduber tabata tin hopi curashi ora el a tuma e encargo pa hospital.
Kico ta un hospital? Un edificio dorna cu cinco strea of un lugar cu ta bira decisivo pa bida y morto di hende?
Ora sigui tur e weganan politico cu e actual oposicion, cu ta responsabel pa problemanan di salud serio di e hospital di Aruba, e pregunta mas grandi ta si mester lanta para y aplaudi e hospital cu Gobierno Wever-Croes a hereda di Gobierno Mike Eman.
Si bolbe na e momento cu Gabinete di Ministro di Aruba a haya un nomber nobo, ta topa cu un hospital den condicionnan sumamente preocupante.
Personal tabata tin miedo di traha den e holor di Diesel di e centro cu mester a scapa hende di morto.
Yobida den hospital, candela riba e dak di e centro, cu a registra fraude, cu te awe a laga pregunta grandi habri.
Situacionnan increibel a tuma lugar na hospital cu informacionnan di pashent, computernan cu a muri y a causa desastre pa no papia mes di resultado di laboratorio.
Problemanan grandi cu awe ta wordo lubida a keda atras den e hospital di cinco strea, cu mester sconde un caminda cu ningun hende por a mira nan.
Awe hospital y cuido medico atrobe ta arma pa hunga politica na un momento cu mundo ta enfrenta un dimension nobo den Cuido Medico, cu mester sigui atende cu un Pandemia cu un rabo cu ta manera poco poco ta descubri.
Tin cierto cambio positivo cu a presenta nan mes den tur honestidad.
E hecho cu Imsan a habri su porta, sigur ta un contribucion enorme y un solucion den tratamento clinico.
Nos ta sigui tambe e funcionamento di director Jacco Vroegop, cu a causa consternacion ora el a atende asunto di vacuna na forma “orthodox” pero mientrastanto e ta duna informacionnan y indicacionnan cu ta sigur realistico pa un hospital cu lo a muri algun tempo pasa, si e tabata pashent.
Cuido Medico, manera semper nos a splica, mester di inversion continuo pa e keda bibo y garantisa bida di hende cu ta busca cuido.
Politiconan cu no sa di kico nan ta papia y cu a hinca Aruba den basta problema, no mester bin crea problema awor na hospital cu mester ta stabil y cu nos ta vigila di acerca den e tempo di pandemia, cu ainda no a conoce un fin sigur.
Nos ta vigila cuido, cu awe mas cu nunca mester di cantidad di personal den un mundo specialisa.
Na Hulanda tin un total di 1.4 Miyon trahador den cuido cu den e desaroyonan mundial ta haya un nificacion mas importante.
Awe cuido medico no mester di hande cu ta hunga politica pa asbest bolbe kima riba dak di hospital.
Awe Aruba mester di politiconan serio cu ta atende cu un materia di vital importancia di un pais, cu ta invita turistanan pa sostene su economia.
E cuido cu un turista por ricibi na un pais ta sigur importante pa e cantidad di e bishitantenan cu e por ricibi.
Pero cuido medico ta keda na prome lugar un asunto di concenshi politico, cu no por mira cinco strea pero bida di hende cu ta depende riba bon maneho experto y no di wega politico pa haya voto!
