Crisis di Ukraine no por ta excusa pa no atende cu peligro di clima --- *Bienestar nacional y personal ta wordo menasa cu mas forsa --- *Cada desaster natural ta destrui adelanto economico y social
ORANJESTAD(AAN)- “Na e momentonan aki e atencion di mundo ta dirigi riba e problemanan cu comercio den petroleo ta crea. Sinembargo, mundo ta wordo menasa pa peligro sumamente serio pa paisnan y hende si no actua awor.”
Den e crisis nobo cu mundo a conoce a base di e situacion na Ukraine, expertonan mundial ta lansa nan preocupacion grandi pa e falta di atencion pa e problemanan cu cambio di clima ta causa.
Den e crisis den Ukraine, hende ta mira peliger pa uzo di bom nuclear cu lo destrui mundo si yega na un guera nuclear.
Hende asina no ta presta atencion na e peligro grandi cu ta aumenta diariamente pa e condicionnan bou cual hende lo mester biba den futuro y e menasa directo cu tin pa bida di hende, salud di hende, bienestar di hende.
Un cantidad importante di cientifico ta di opinion cu ya tin cambionan cu no por wordo coregi mas. Sinembargo, cada dia cu pasa mas peligro ta wordo crea.
“Clima a wordo uza pa haci propaganda politico of a wordo trece na un forma cu no a haci Pueblo realmente consciente di loke ta na wega,” informantenan importante ta splica DIARIO.
Cambio di clima ta nifica, cu hende ta wordo directamente expone na mas peliger manera na desastrenan natural cu cada dia ta bira mas pisa.
“No mester para keto na e cantidad di desastrenan cu ta tuma lugar, pero na e intensidad, cu ta afecta hende y paisnan na forma serio,” nan ta mustra.
Ta papia aki di fenomenonan natural, cu lo tin resultado mucho mas desastroso na lugarnan cu no tabata conoce of despues di adaptacionnan tecnico pa atende cu naturalesa, no tin tanto problema cu condicionnan di clima.
Informantenan a mustra riba gastonan enorme cu tur pais a tuma pa proteha nan mes contra lama, condicionnan di tempo y tur loke ta afecta hende.
A construi bareranan pa lama subi tera. A traha ducto pa awa bay lama na momento di yobida. E forsa di atake di naturalesa ta aumenta mientras otro aspectonan ta bini dilanti.
Ora e nivel di lama subi, e ta causa inundacion por ehempel. Terenonan riba cual ta planta cuminda ta wordo afecta. Cria di bestia ta sufri.
Ta wordo mustra riba e resultado pa viviendanan y tur loke hende a logra den tempo.
E produccion di cuminda ta wordo afecta. Industrianan ta sufri den brutalidad di naturalesa cu ta afecta viviendanan tambe.
E forma cu cambio di clima na principio a wordo presenta, a haci cu el a keda asunto pa un grupo chikito.
Publico mester cuminsa realisa cu por ehempel den e region di Aruba, den futuro sigur mester tene na consideracion condicionnan di tempo mas pisa cu lo afecta bida diario.
Ya ta un hecho cu na momento di yobida pisa, trafico ta tranca y bida normal ta wordo interumpi.
Kico lo pasa si situacionnan mas pisa cuminsa afecta e pais? Con paisnan na mundo ta sobrevivi gastonan enorme pa loke ta wordo afecta dor di condicionnan nobo di tempo y con ta atende cu e impacto cu e tin riba hende?
Expertonan na nivel mundial mientrastanto ta nenga den nan mayoria pa permiti e situacion actual di guera, afecta nan posicion enfrente cambio di clima.
Nan ta adverti cu ya no por deshaci di cierto efectonan cu a bira realidad. Pero si por tuma medida na tempo ainda pa evita situacionnan di hamber y miseria di terenonan fertil cu no por produci mas na lugarnan cu lo bira desierto mientras na otro lugarnan na mundo, nivel di awa lo kibra construccionnan y inunda terenonan caminda hende ta biba y produci su cuminda.
