ORANJESTAD (AAN): Tisa Lasorte di Aruba Hotel and Tourism Association (AHATA) a haya su oportunidad pa reuni cu Formador di Gobierno, Evelyn Wever-Croes.
La Sorte, despues di e reunion a duna di conoce cu esaki tabata un bon oportunidad pa AHATA por a sinta cu Formador. A sinta cu tur dos partido cu ta den combersacion cu Formador pa forma un gobierno nobo.
A papia riba e preocupacionnan mas grandi cu AHATA tin y e prioridadnan cu AHATA tin cu e gobierno nobo lo mester tin tene cuenta cu ne. Esey ta inclui e problema di e planta na Bubaliplas, Riool Water Zuiveringsinstallatie (RWZI), cual ta un peliger grandi pa Aruba.
E planta aki sino wordo drecha por bira un siguiente crisis pa Aruba y e por daña e beachnan pa motibo di e problema di e falta di capacidad na e planta.
Sra. Lasorte a bisa cu a papia riba esey como un prioridad.
Tambe a papia riba Landspakket di e necesidad pa e gobierno por atende cu e ehecucion di e Landspakket y dune forma y contenido.
A agrega cu sector priva y stakeholders ta pidi pa tin un participacion mas tempran den duna e definicion na e aspectonan di Landspakket y pa por ta inclui den yega na e solucionnan cu mester yega cu ne.
E representante di AHATA a laga sa cu a papia tambe riba reforma fiscal y ley laboral pa por tin mas productividad den economia. Di e forma aki a papia di varios aspecto cu tin atencion di AHATA, incluyendo proteccion di e presupuesto di Aruba Tourism Authority pa por continua cu e mercadeo internacional.
A elabora mas cu claro riba e desaroyo economico cu mester bay man den man cu proteccion di naturalesa. Na januari 2019 a pidi pa regulacion di e tournan di UTV y ATV's, por ehempel.
