*No a dicidi ainda si ta bay tin 7 minister of mas
ORANJESTAD (AAN): Diahuebs durante un conferencia di prensa, Prome Minister Evelyn Wever Croes a duna un update cortico riba e proceso di formacion di un gobierno nobo.
E mandatario a splica cu e formacion ta bayendo bon.
“Nos ta atende esaki den diferente fase”.
E prome fase ta e acuerdo di gobernacion den cual nos tin cu yega na otro.
Nos ta yegando na otro den lineanan grandi, sinembargo nos ta wardando si riba tur e reunionnan cu stakeholders, pa inclui nan puntonan tambe den e acuerdo, pasobra bo no kier yega na un acuerdo anto despues bo ta papia cu stakeholders cu ta trece algun idea y punto pa dilanti cu bo por a tene cuenta cune, segun Wever Croes.
El a splica cu otro siman lo papia cu mas stakeholder, pero e idea no ta pa papia cu tur hende na Aruba, pero si den lineanan grandi pa haya un idea di e retonan mas grandi pa tene cuenta cu esakinan.
Segun Prome Minister, despues lo papia riba reparticion di e ministerionan entre partido MEP y partido RAIZ.
“Una vez cu nos sa cua ta e ministerionan cu cada un ta haya, e ora ey cada partido ta bay haci un proposicion pa candidatonan pa minister”.
Despues di esaki e procedura di screening lo cuminza tambe, segun un landsbesluit cu nos tin di September 2013, cu ta e punto di salida pa cue screening, segun Wever Croes.
El a indica cu mester tene cuenta cu e hecho cu esaki ta un proceso cu ta tuma su tempo.
“Nos no por wordo pura un haya presion di keda cla lihe, pasobra e ta un proceso cu tin cu cana hopi hopi bon”.
Na momento cu como Formador mi mester screen un cantidad grandi di hende, e ta tuma mas tempo dimi pa por haciele y mi mester por hacie den tur trankilidad, segun e Prome Mandatario.
El a bisa cu ta dificil pa bisa cuanto tempo esaki ta bay dura.
Banda di esaki e mandatario a bisa cu no tin ningun pleito of discordia ni entre RAIZ y MEP y ni den MEP mes, manera cu a wordo specula.
A puntra Wever Croes si e sa caba si ta bay tin 7, 8 of 9 minister y el a bisa cu ningun decision riba esaki a wordo tuma ainda.
Riba e pregunta cu si a wordo dicidi caba si RAIZ ta haya 2 ministerio, e mandatario a bisa cu riba esey tampoco a tuma un decision ainda.
