Ban domina Presion Halto
ORANJESTAD (AAN): E etiket (‘label’) di un producto ta bisa hopi di e ingrediente. Pesey ta importante ora di bay supermercado pa pone atencion riba e label di e productonan cu bo ta cumpra.
Salo ta contene e mineral sodium cu por trece problema pa bo salud si bo come dimas. Sodium ta aparese bou di diferente nomber riba e label. Algun ehempel ta: salt, zout, sodium chloride, NaCl, Monosodium glutamate (MSG), baking soda, baking powder, Disodium phosphate. Recomendacion pa salo pa adulto ta 6 gram (2.4g di sodium) of menos pa dia cu ta un telep di salo.
Ora di haci compras tuma bo tempo pa compara e label di diferente producto. Busca e productonan cu, segun label, tin 5% of menos di e cantidad recomenda pa dia di sodium (5% or less of the Daily Value for sodium). No lubida di check e ‘serving size’ ful ariba di e ’Nutrition Facts’ pa wak kico ta e midi, sea na peso (oz), telep/cuchara (tsp/tbsp) of cup, di e producto pa cual e calculacion di ‘Nutrition Facts’ ta haci. Por ehempel e ‘serving size’ ta 1 cup y abo ta come 2 cup (di midi) di sopi. Pa bo haya sa cuanto sodium bo ta come bo mester multiplica e cantidad di sodium menciona riba e ‘Nutrition Facts’ cu 2.
Ta hopi importante pa midi bo cuminda regularmente pa bo sa e cantidad cu bo ta come y con e ta mustra den bo tayo. Asina bo por compara por ehempel bo tayo segun recomendacion pa un cuminda saludabel y balasa y si mester drecha esaki.
Control gratis: Bo ta desea mas informacion y tambe check bo presion, sucu, peso y cintura? Pasa cerca nos diasabra dia 21 di mei for di 8’or di mainta pa 12’or na Club Kibrahacha of diasabra dia 4 di juni for di 8’or di mainta pa 12’or na IBiSA San Nicolas (Sportcentrum). Praktijkondersteuners conhuntamente cu DVG y IBiSA ta cla pa haci un chekeo gratis y no mester ta na yuna pa participa. Nab ta warda bo!
