ORANJESTAD (AAN): Pa eleccion 2021, pa yuda reduci e aglomeracion di hende y e oranan largo di trahadornan di Stembureau tin di keda na trabao, a bin cu sistema pa facilita e conteo di voto.
Esey ta un scanner, cu cada votador mes tin di dobla y habri bek su papel di voto cu tur informacion poni abao, y pone den e scanner.
E scan lo lesa e informacion, tabula pa ken e voto ta, y despues e machine mes ta bente den e buzon.
E scanner di e marca Dominion Voting Systems lo ta instala riba e buzon. Pero segun Glenn Thode di Conseho Electoral, e sistema di scan tin un limite. Esey ta e grandura di e stembiljet.
E scanner por scan solamente 11 partido politico riba e stembiljet. Si acaso pa eleccion 2021 tin mas Partido cu e scanner por procesa, e ora lo bay tin di cancela e uso di scanner ora di entrega stembiljet na e buzon. E ora lo bolbe usa e sistema bieu di djis benta e stembiljet den buzon, sin scan nada.
Aruba no a cumpra e machinenan aki, y ta djis bay lease e sistema di scanner di Dominion Voting Systems di Merca. E compania ta garantiza secrecia total di nan sistema, y a opera nan exitosamente na diferente pais rond mundo.
Glenn Thode a mustra cu e tambe a mira confianza na otro paisnan cu a usa e sistema aki. Cu garantianan asina, e resultado ta integro y di confia, mescos cu tabata den eleccion pasa.
Como cu ta bay usa scanner pa eleccion venidero, tin di haci algun cambio temporal den leynan pa nan uso. E leynan aki ta casi cla pa asina por use. Conseho Electoral no tin forza pa dicidi ki tempo ley ta pasa, pasobra esey ta algo cu Gobierno y Parlamento tin di keda encarga cune.
Pakico no a bin cu cambio di ley prome cu inverti den equipo? Segun Thode, tabata preparando pa esaki ta cla pa fin di September. Diripiente timeline a cambia y awor eleccion a hala mas dilanti pa Juni 2021.
E scanner ta un herment importante awor den pandemia pa mitiga e brote di Coronavirus. Pero si acaso no por usa e scanner mas pa eleccion 2021, e ora lo bay na e sistema antiek pero esey ta trece hopi riesgo pa cu transmission di virus pasobra tin hopi mas accion fisico y e cantidad di urna lo causa mas aglomeracion di hende.
Dominion Voting Systems ta existi basta tempo caba, y a usa nan na paisnan cu tin retonan aun mas grandi. Lo haci nan best pasobra e ta un necesidda mirando e dificultad di eleccion pasa y awor mas ainda e situacion di pandemia ta pone cu ta mihor pa reduci e cantidad di chens cu hendenan ta mishi cu obhetonan fisico.
