ORANJESTAD (AAN) – Minister Presidente, Evelyn Wever-Croes, a contesta preguntanan di prensa, relaciona cu e proceso electoral 2021, cu ta Dia 25 di Juni proximo.
El a wordo puntra tocante cierto gruponan di presion cu tin dudanan tocante e proceso, specialmente e aspecto di digitalizacion cu, aparentemente, mester a tuma lugar debi na e situacion di pandemia, cu Aruba ta pasando aden; y tambe tin hende di otro color politico, cu ta adelantando nan mes na “un posible fraude electoral”.
Minister Presidente a expresa pa esnan di oposicion: “piensa el ladron que todos son de su condicion” y a poniendo e opinionnan aki den un contexto hopi stricto, e mandatario a comenta: “E Gobierno aki ta respeta e sistema democratico. Loke ta secrecia di voto ta algo cu ta sagrado y ningun hende ta bay mishi cu esey, y nos sigur cu no!”
E dignatario a señala cu ora el a drenta den gobierno na November di aña 2017, un di e prome evaluacionnan tabata cu e ekipo cu a atende cu eleccion, na September 2017.
“Nan a trece asina tanto ponencia padilanti, cu mi mes a spanta, con ex-prome minister Mike Eman tabata mete den e proceso di eleccion. Con ex-minister di husticia Arthur Dowers, tabata mete den e proceso di eleccion. Con candidatonan di AVP cu ta aparece riba lista, pero cu ta traha den gobierno, tabata mete den e proceso di eleccion. Anto nos a tuma un decision como gobierno, cu e bochorno aki tin cu caba. Nos a cambia e sistema y a pone tur cos atrobe, den man di Conseho Electoral, cu ta un entidad totalmente independiente, y ta regi, supervisa, goberna pa Corte di Husticia y Algemene Rekenkamer, no Gobierno di Aruba”, Minister Presidente a indica.
E mandatario a splica cu Gobierno ta asisti cu fondo pa Conseho Supremo Electoral por haci su trabao manera mester ta. Nan a traha un rapport basta extenso na 2018, cu el a publica y presente na Parlamento.
“Tur e iregularidadnan ey t'eyden, cuanto biaha ministernan di AVP ta yama bisa ‘pone e persona ey den e registro pasobra e mester vota’. ‘Saca e persona ey for di e registro pasobra e no mester vota’. Nos no ta haci e cosnan ey. Nos a stop cu esey y mi a bay Parlamento cu e lista di nan proposicionnan di cambio. Den e lista di proposicion tin hopi digitalizacion, nos ta para pa innovacion con tal cu e ta na un manera safe. Nos a sostene y busca fondo pa pone disponible, pa Conseho Supremo Electoral haci un trabao diferente na 2021”, Premier Wever-Croes a informa.
