Reaccion di Hunta di Supervision di Hospital
ORANJESTAD (AAN): Hunta di Supervision di Horacio Oduber Hospital (HOH) a tuma nota di discusionnan andando den medionan di comunicacion encuanto e incidente cu miembro di Hunta di Directiva di HOH riba 22 di April 2022 na unda ta haci e reproche cu no lo a tuma ningun medida. Hunta di Supervision di HOH pa medio di e reaccion aki kier duna di conoce cu esaki no ta cuadra cu berdad y cu si a tuma medida contra sr. Croeze.
Na momento cu tuma medida esaki mester wordo haci conforme hurisprudencia cu ta semper den proporcion cu e incidente. Hunta di Supervision a tuma sumamente na serio e incidente cu ta implica sr. Croeze y a haci su debido investigacion kico tabata e situacion exacto pa asina tuma medida apropia. Y mester duna di conoce cu e medidanan cu a tuma ta den proporcion cu e situacion di e caso.
E comparacion cu ta wordo haci den medionan di comunicacion cu dos otro caso di perfil halto cu a tuma luga recientemente no ta di compara mirando cu e situacionnan y e gravedad di e casonan ta completamente diferente y pues tambe e medidanan cu mester wordo tuma. Pero nos como Hunta di Supervision kier enfatisa si cu nos ta desaproba completamente e incidente cu sr. Croeze tabata aden.
Sr. Croeze na tur momento a duna su cooperacion completo y alabes a pidi su disculpa publicamente. Hunta di Supervision tin pleno confiansa cu e medidanan cu a tuma ta exclui ripiticion di e mesun comportacion di e persona en cuestion.
Hunta di Supervision ta spera cu comunidad tin e confiansa cu e medidanan tuma ta apropia y bon evalua.
Hunta di Supervision continuamente lo keda haci todo por todo dentro di e organisacion den cuadro di concentisacion di tur peliger cu por presenta na momento cu core bou influencia.
E Hunta di Supervision di Hospital ta conforma door di M. van den Burg, Voorzitter RvT, A. Ellis – Schipper, lid RvT y F. Ho-Kang-You, lid RvT
