Showroom Colombiano ta fortalece comercio entre Aruba y Colombia  

Sharon Meijer di Departamento di Asunto Economico:

ORANJESTAD (AAN): Sharon Meijer di Departamento di Asunto Economico, Comercio y Industria a expresa satisfaccion cu Aruba ta ricibi, pa di tres biaha, un showroom Colombiano cu diferente producto di agroindustria.

   E showroom ta presenta un variedad amplio di producto. Departamento di Asunto Economico den nomber di Gobierno, ta asisti e evento pa di tres biaha, pa duna compradornan local, importadornan, wholesalers y supermercadonan oportunidad di conoce e productonan di agroindustria cu Colombia tin di ofrece y explora si por trece e productonan aki pa un miho prijs.

   Durante e evento, comerciante local por sinta conversa directamente cu e exportadornan Colombiano y explora posibilidadnan pa yega na un negociacion. Tambe nan por wak e productonan di cerca, purba nan y evalua e calidad di e productonan.

Meijer a remarca cu varios di e productonan presenta ya ta drentando mercado

   Mericano y Europeo caba, mientras cu algun ya ta wordo exporta pa Merca. Segun Meijer, esaki ta confirma cu ta trata di productonan di calidad hopi halto na un bon prijs.

   Departamento di Asunto Economico ta spera cu e showroom lo conduci na mas producto Colombiano riba mercado local y, eventualmente, na miho prijs pa consumidor Arubano.

   E relacion comercial entre Aruba y Colombia ta sigui crece. Departamento di Asunto Economico ta aporta na e proceso pa crea un relacion comercial mas estrecho entre ambos pais, mientras cu importadornan local a indica cu tin demanda pa producto Colombiano na Aruba.

   E esfuerso pa amplia opcionnan di importacion no ta limita na Colombia. Meijer a menciona cu recientemente Minister Geoffrey Wever a bishita mercado di Republica Dominicana pa explora diferente producto, entre otro carni, producto agricola y producto di otro sector.

   “Tur esaki ta cu e intencion pa nos por mehora y trata di baha prijsnan na Aruba,” Meijer a bisa.