Shoco Boulevard ta un ehempel di con por traha hunto na beneficio di naturalesa

Parlamentario Jennifer Arends-Reyes (AVP):

ORANJESTAD (AAN) – Recientemente Sra. Jennifer Arends-Reyes, a ser invita den calidad di Presidente di comision di Turismo na e ceremonia oficial cu a tuma luga diadomingo pasa na Joia Iberostar. Durante e evento, Arends-Reyes a participa activamente den e acto simbolico di hinca shobel y yuda completa un cas pa Shoco, un momento cu ta marca e comienso di un proyecto bunita pa nos isla manera ta e Shoco Boulevard.

            Den presencia di ehecutivo hotelero, organisacion ambiental, otro mandatario y invitadonan special, e parlamentario a enfatisa importancia di trabou duro, union y compromiso pa logra desaroyo sostenibel pa Aruba. "Nos ta traha pa un futuro mas prospero, unda progreso y bienestar ta disponibel pa tur Arubano," asina Arends-Reyes a expresa.

            Durante e ceremonia, cu a keda caracterisa pa un ambiente di speransa y determinacion, Sra Arends-Reyes a destaca e necesidad pa sigui inverti den proyecto cu ta fortalece nos economia, pero cu na mesun momento ta crea oportunidadnan pa hubentud y preserva nos medio ambiente.

            Su participacion den e ceremonia di lansamento di Shoco Boulevard ta demostra su compromiso firme pa sigui traha cu diferente stakeholders pa un Aruba cu ta berde y sostenibel. Sra Arends-Reyes ta gradici y felicita Joia pa e invitacion y coordinacion excepcional y lo desea di wak mas iniciativanan similar den e sector hotelero.