Sharin Croes Dubero a despedi di studiantenan cu a biaha pa Hulanda abordo di e vuelo KLM 767

Sharin Croes Dubero, Coordinador Facilidad di Estudio, na Departamento di Enseñanza,

tabata na aeropuerto Reina Beatrix, pa despedi e 107 studiantenan cu a subi e vuelo di KLM 767, cu direccion Hulanda.

Sharin a indica cu en total, e aña aki, Departamento di Enseñanza hunto cu Minister di Educacion a otorga 184 fianza pa estudio, na studiantenan cu ta bay sigui nan estudio na Hulanda. E grupo ta mas grandi pero 184 ta bayendo Hulanda, Sharin a comenta.

Di eseynan e otronan 77 tin cu ta bayendo caba of ta bay den e periodo nos dilanti.

E aña aki tin 39 studiante cu a bay studia na Den Haag, 23 a scoge pa bay biba na Eindhoven, y 22 na Utrecht. Esaki ta e ciudadnan mas popular e aña aki. Encuanto nan escogencia di estudio, Sharin Croes-Dubero a comenta cu tin un grupo hopi grandi cu a scoge pa “Business” (Finanzas) y tambe ICT, cu tambe ta un grupo grandi y por wak cu e escogencia aki ta creciendo.

El a agrega cu ora e studiantenan yega Hulanda, nan ta bay cu bus na nan ciudad, nan ta pasa un anochi na hotel, y e dia despues cu nan por descansa y un dia despues e opvang ta cuminza. Sharin Croes-Dubero ta desea nan tur sorto di exito durante nan estudio, y pa haci nan best pa logra nan meta.

Riba combinacion di potret por aprecia con e ambiente di despedida di nos studiantenan, cu a biaha pa Hulanda, tabata. DIARIO y su Seccion Hubentud den Movecion ta desea nan tur hopi exito den nan estudio, cu e meta di prepara pa un futuro y caba un carera profesional prometedor y den nan crecemento como persona conociendo y adaptando na otro cultura, amistadnan nobo, clima diferente, y claro hibando den nan curazon nan Pais Aruba y su solo, su lama, su playanan y e calor di nan hogar.