ORANJESTAD (AAN): Segun Parlamentario Shailiny Tromp-Lee di MEP, analisando e desaroyo den opinion y pensamento ultimo dianan encuanto e negosacionnan andando entre Gobierno y Hulanda pa loke ta trata refinanciamento di nos debe cu Hulanda, e ta keda preocupa.
Cu tin hende ta urgi of kier exigi Gobierno pa sin mas acepta RAft “as is” como condicion ta algo incomprendibel. Esaki ta e caso caba si solamente nos mira e trayecto encamina y postura demostra pa Hulanda. Pero ban laga esakinan un banda y ban analisa e impacto cu cierto normanan ancra den e concepto di ley lo por tin pa nos pais. No solamente Fraccion di MEP a bin ta señala esakinan, pero tambe Raad van State di Hulanda, Raad van Advies di Aruba, Evaluatie Adviescommissie cu a evalua RFT (ley di supervision financiero di Curaçao y Sint Maarten) y e experiencia di nos rumannan isla cu RFT.
Corectamente Raad van State di Hulanda a conseha cu e normanan ta bay stroba pa por haci inversion den nos pais. Ademas cu mester percura cu nan ta realistico, alcansabel y sin consecuencia negativo, tambe mester tene debido cuenta cu e impacto cu nan por tin a largo plaso pa nos pais. Pasobra e realidad ta cu e normanan ta tranca e capacidad di crecemento di nos economia door di limita e posibilidad di haci inversionnan necesario y importante. Pa fortalece nos economia y pa e ta uno mas robusto, duradero y sostenibel, nos mester haci nos pais menos dependiente di turismo. Pa logra esaki nos mester crea pilar(nan) economico nobo door di inverti den diversificacion. Door di e normanan esaki ta keda obstaculisa pasobra e inversionnan necesario no por tuma lugar. E norma aki a impacta negativamente e desaroyo economico na Curaçao y Sint Maarten. Dus ta incomprendibel cu Hulanda kier sigui impone dicho norma riba Aruba tambe.
For di un conseho di e Evaluatiecommissie 2021, a mustra cu e manera con supervision ta keda realisa actualmente tin efecto indesea riba e desaroyo di un strategia socio-economico a largo plaso. Diferente rason ta keda presenta, por ehempel, cu e normanan ta conta aña tras di aña y por lo tanto nan no ta ofrece e margen necesario pa por haci inversionnan importante y necesario cu den futuro mester percura pa e rendimento necesario y desea. Tampoco e normanan ta tene cuenta cu “consumptieve uitgaven” tambe por tin nan rendimento economico structural of pa algun aña manera por ta e caso cu enseñansa.
Na Europa tin acuerdo cu e presupuesto mester ta den balans of mester tin un surplus. Sin embargo, e obhetivo aki no mester keda alcansa de inmediato, mas bien e paisnan di EU mester demostra cu nan ta trahando pa logre. Ta keda teni debido cuenta cu loke a largo plazo ta deseabel y mihor pa e pais, na lugar di anualmente controla si ta cumpli cu e normanan.
