AZV riba Dia Mundial di Alzheimer
ORANJESTAD (AAN): Un dokter Aleman, Alois Alzheimer, tabata e prome dokter pa identifica e malesa cerca un pashent muhe na 1901. Asina e malesa a haya nomber. Hasta ta consider’e como un malesa di famia pa motibo di su impacto riba tur ser keri di mas cerca di e persona cu tin’e. Anto e mas dificil di e diagnostico demencia tipo Alzheimer ta cu te ainda (awe) no tin cura p’e. Dokter por solamente yuda cu remedi pa purba frena e desaroyo di e malesa.
𝗥𝗲𝗰𝗼𝗿𝗱𝗮 𝘆 𝗰𝗼𝗻𝘀𝗰𝗶𝗲𝗻𝘁𝗶𝘀𝗮
Tur aña ta recorda e Dia Mundial di Alzheimer riba 21 di September. Un dia special pa pone atencion na e malesa cu meta pa conscientisa mas hende tocante Alzheimer sin lubida di sende bela pa e sernan keri cu nos a perde como resultado di Alzheimer.
Ironia di bida ta cu generalmente e persona cu tin demencia tipo Alzheimer ta fayece di diferente otro condicion manera blokeo di ader, pneumonia, sepsis of otro cu ta origina como complicacion di Alzheimer.
𝗥𝗲𝗽𝗼𝗿𝘁𝗲 𝗺𝘂𝗻𝗱𝗶𝗮𝗹 𝗮𝗻𝘂𝗮𝗹
Pero tin persona cu ta muri mas directamente di Alzheimer, por ehempel ora cu e persona su cerebro ya no ta funciona y ta perde habilidadnan crucial manera hala rosea of guli cuminda.
E prome Reporte Mundial Tocante Alzheimer a wordo lanza na 2009 riba Dia Mundial di Alzheimer y desde e tempo ey anualmente ta saca un publicacion.
Asina mes cu hopi esfuerzo ta wordo haci pa conscientisa mas hende tocante demencia tipo Alzheimer, toch tin hopi hende cu ainda ta kere cu e ta “malesa di bieu”. Sinembargo, esey no ta e caso mas. Lamentablemente tin hopi hende bou di e edad di 65 cu tambe ta sufri di demencia tipo Alzheimer.
