ORANJESTAD (AAN) – Parlamentario Shailiny Tromp-Lee a referi den conferencia di prensa na e situacion financiero di Aruba, na e momentonan aki y su sugerencia na Gobierno pa aumenta salario minimo.
Tromp-Lee a duna di conoce cu calculacionnan ta bay keda wordo haci, pa loke ta trata cifranan di inflacion. El a expresa cu na mas di un ocasion el a trece dilanti e preocupacion cu fraccion di MEP tin, pa loke ta trata no solamente e parti di inflacion, pero tambe scarcedad di producto y e nivel di bida di nos hendenan y ta bira un reto pa nos hendenan por mantene e clase di bida cu nan ta custumbra cune.
“Poder di compra a bay drasticamente atras, y esey ta algo cu nos fraccion ta hopi conciente di dje; constantemente nos ta den contacto cu gobierno, pa percura pa bin cu e asistencia y compensacionnan necesario, y mas cu tur cos pa por garantiza un nivel di bida digno pa esnan mas vulnerable, aki den nos pais”, e parlamentario a comenta.
Tromp-Lee a agrega cu recientemente, gobierno a presenta su plan di scale 2023 y aki por a tuma nota e diferente atencion cu ta word duna, no solamente na e grupo di pensionado, pero tambe na esnan mas vulnerable di nos pais introduciendo, por ehemplo, rebaha riba pago di impuesto pa un suma di hasta 30 mil florin. El a bisa cu, logicamente esnan cu schouder mas hancho tin cu bay paga un tiki mas y esnan chikito ta keda exonera di pago.
E parlamentario a menciona cu tur aña, na December, CBS ta calcula inflacion y pa loke ta trata e aña aki, e lo bira e punto di discusion riba e posible aumento di salario minimo. Esaki ta algo cu a wordo trata den fraccion di MEP, y cu mester wordo atendi debidamente. “E poder di compra di nos hendenan, manera mi a bisa anteriormente, ta bao di presion y un di e maneranan cu nos por duna esaki atencion, ta mediante aumento di minimum loon, y esaki mi ta sugeri gobierno pa tuma un evaluacion serio”, Tromp-Lee a señala.
Esaki ta e caso rond mundo y Hulanda mes a anuncia un aumento salario minimo di 10%, for di entrante 2022 mes.
