Na caminda pa su aniversario DIARIO ta acepta reto di futuro
*E lucha pa un economia fuerte den lama bruto ayera y awe
*Logro di Capitannan di Industria lo anima hoben enfrente 2023
ORANJESTAD (AAN) — E situacion mundial ta keda tenso. E suspenso cu ta afecta comunidad mundial, cu ta confronta cambio di 2022 pa 2023, ta entrega un encargo na periodismo pa frena e peliger di tanto negativismo cu ta kita animo na hobennan cu mester bira dirigente den futuro.
Dia 2 di November 1980 ora Jossy Mehsen Mansur den cooperacion estrecho cu su esposa señora Nuhad Mansur, a entrega DIARIO na Aruba, e Arubano a wordo entrega un arma pa na tur forma bringa contra tur elemento y den tur dificultad cu ta pone Aruba na peliger.
Historia di DIARIO ta wordo forma dor di alegria y dolor cu tabata suerte di e Arubiano, cu na DIARIO a presenta su problemanan di mas grandi pero tambe a comparti cumpleaños, momentonan amargo y e realidad di bida di hende cu no ta un caminda cu ta cana riba rosa.
Awe nos ta prepara atrobe pa celebra aniversario di DIARIO, cu mantene bibo e concepto di Jossy Mansur cu e bienestar di e Arubiano y Aruba ta e motibo di existencia di DIARIO.
Nos a analisa e situacion actual, cu ta resultado di tanto factor.
Na prome lugar nos ta bolbe na 2017, ora Aruba a spierta pa topa cu un futuro cu tabata asina insigur, cu ningun instancia oficial por a bisa kico futuro realmente lo entrega na e pais.
Na 2018 nos mester a presenta na Aruba e pakete di medidanan, cu mester a scapa e pais cu tabata den estado di bancarota y bou supervision Hulandes.
Ta hunto cu Hulanda a traha e plan financiero pa futuro y Aruba a pensa na final di 2019, cu un futuro nobo ta habri.
Na 2020 nos mester a informa Aruba, cu economia di e pais mester cera su porta y Aruba, cu for di 2014 a perde su autonomia ora Hulanda a bin exigi Aruba pa stop di malgasta placa, mester a aplica pa un prestamo enorme na Hulanda.
A pensa cu na 2022 Aruba lo por a recupera, pero Guera di Ukraine a rementa ora ya petroleo a cuminsa haci bida mas dificil na 2021.
Pa dicidi con nos ta prepara pa nos celebracion di nos aniversario, awe manera semper nos kier ofrece Aruba e treat cu Aruba merece.
Den e situacion di guera, di problema y desaliento, nos ta presenta na Aruba e capitannan di industria di Aruba, cu a tene e base comercial y economico di Aruba na Aruba a asina e pais por tabata tin un porvenir financiero.
Cu cada Arubiano cu den temponan dificil a tene e Florin den circulacion y cu nos lo presenta riba nan tereno, nos lo entrega na Aruba e mensahe pa sigui cana y pa nos permiti pa nada stroba Aruba di mantene su fe den Dios, cu tabata semper cu Pueblo di Aruba, cu ta forma pa luchadornan incansabel manera nos lo demostra.
Nos lo brinda cu un cocktail di speransa pa e futuro di Aruba, den cual nos tur hunto mester coopera.
Pa economia di Aruba ta solido, e Florin mester circula na Aruba, pues den e economia cu a crece na man di empresarionan incansabel cu ta comercio cu ta entrega trabou na e trahador cu ta entrega Aruba su labor.
Aruba por! Aruba a demostra cu Aruba por y awe nos ta yuda pa mantene loke a scapa Aruba den pandemia, cu ta e forma cu e planificacion di Gobierno Wever-Croes pa tene Florin den circulacion durante pandemia a evita un desaster social.
Aruba tabata e motibo di nacemento di DIARIO. Felicidad di Aruba y e Arubiano tabata e proposito principal di e matutino di Aruba, cu Jossy Mehsen Mansur a laga atras como herencia na su pais.
Awe hunto nos lo sigui lucha pa enfrenta 2023 cu e miho arma di Aruba, cu ta e Arubianonan cu a confronta bon y mal tempo y cu awe ta duna Aruba y tur turista cu ta yena caya di Aruba cu nan produccion empresarial, cu ta base di un bon bida social pa henter e pais.
E empresario di ayera no solamente mester duna prueba di su trabou incansabel pero tambe lo mester inspira Aruba pa gasta e Florin Arubano na Aruba. Pa permiti e Florin Arubano, pa cual tanto Aruba a lucha, pa crea e trabou den comercio local pa tur Arubiano!
Den pandemia, e forma cu Gobierno a percura pa e Florin lora, e tene e Florin na bida. Awe na caminda pa un futuro di recuperacion mundial, hunto nos lo mantene e Florin den circulacion pa hunto sostene e futuro cu e Arubiano merece!
