ORANJESTAD (AAN): SETAR ta anuncia cu entrante 1 di augustus 2026 lo desconecta su red di 2G, como parti di su compromiso continuo pa
modernisa su infrastructura di telecomunicacion y sigura calidad di servicio, confiabilibidad y seguridad pa tur nos clientenan.
Rond mundo nos ta wak cu e industria global di telecomunicacion ta desconectando e tecnologia di 2G y 3G pa traha luga pa tecnologianan di ultimo generacion, enfocando riba rednan mas avansa y eficiente, esta 4G y 5G.
Impacto riba cliente y device
Despues di 1 di augustus, devicenan y servicionan cu ta traha exclusivamente riba e red di 2G lo stop di funciona. Esaki ta inclui, entre otro:
- Telefonnan bieu cu ta traha solamente riba 2G
- Sistemanan di alarma y seguridad cu ta traha solamente riba 2G
- Point-of-sale (POS) terminals cu ta traha solamente riba 2G
Ta recomenda clientenan cu ta uza ekiponan aki pa cuminsa planifica e transicion pa devicenan y SIM cardnan compatibel cu e red di 4G of 5G p’asina evita interupcion di servicio. Despues di desconecta su red di 2G, SETAR ta premira cu su red di 3G lo wordo desconecta na aña 2029.
Un stap padilanti pa conectividad na Aruba
E transicion aki ta refleha SETAR su compromiso pa ofrece rednan moderno cu ta cumpli cu e demandanan creciente di comunicacion digital, conectividad di negoshinan y tecnologia smart rond di nos isla.
