ORANJESTAD (AAN): Fundacion Stimami Sterilisami ta expresa su profundo gradicimento pa e sosten continuo di Setar N.V. durante e añanan ,
y pa su donacion generoso di Afl. 7,500 pa duna inicio na 2026.
Dirigi pa señor. R. Croes, señora Ho y señora Donata, y cu apoyo di e team di Setar, e contribucion aki ta mas cu solamente sosten financiero; ta un reconocimento significativo di e esfuersonan continuo di e fundacion pa controla den un manera humano e populacion di animalnan riba caya na Aruba, mediante su programa di sterilisacion cu ta cubri full e isla.
Danki na e donacion di Setar N.V., hunto cu e apoyo continuo di nan contribuyente fiel, 6,405 pushi y cacho a wordo sterilisa den 2025, aumentando e total di sterilisacionnan entre 2016 y 2025 na mas cu 46,000 mascotanan.
E suma di Setar N.V lo wordo compensa cu un suma igual florin pa florin pa Bucuti & Tara Beach Resort. Hunto e contribucion aki lo yuda cubri e costo di sterilisacion gratis di pushi y cacho rond di Aruba.
Cu e sosten continuo pa 2026, Stimami Sterilisami lo por continua su mision pa logra e cantidad maximo di sterilisacion posible pa pushinan y cachonan, cu e meta di mehora e bienestar di animal y reduci e cantidad di animalnan riba caya—un desafio cu ta tin impacto amplio riba e animalnan, nos comunidad y esnan cu ta bishita nos isla. Nos ta profundamente agradecido pa e alianza di Setar N.V. y ta mira dilanti na un colaboracion duradero y productivo.
Fundacion Stimami Sterilisami ta un organizacion caritativo dedica na reduci den un manera humano e cantidad di pushinan y cachonan abandona na Aruba, mediante su programa di sterilisacion cu ta cubri full e isla. E fundacion ta uza 100% di e donacionnan pa yuda cubri e costo di sterilisacion pa doñonan individual di mascotanan y organizacionnan boluntario cu ta cuida animalnan di caya.
