ORANJESTAD (AAN): E compania Setar NV ta orguyoso di contribui na e Student Development Fund di Universidad di Aruba.
Pesey riba Diamars mainta, e team di Setar tabata presente na Universidad di Aruba pa entrega un check di Donacion hopi significativo.
E compania pa di tres aña consecutivo ta contribui cu 10.000 Florin na e Student Development Fund di Universidad di Aruba. Un fondo cu ta worde uza pa yuda studiantenan di Universidad di Aruba cu tin necesidad pa ayudo financiero durante nan estudio, por ehempel, pa costonan relata na nan estudio, costonan di vivienda of pa stage den exterior.
Na opinion di Setar, nan como compania nacional di telecomunicacion, ta importante pa aporta continuamente na e futuro di nos isla y e generacion cu ta bin, por medio di sosten na educacion, innovacion y colaboracion. Ademas, Setar ta sigui cu su compromiso pa conecta tur nos scolnan na Aruba riba e infrastructura di Fiber, contribuyendo asina tambe cu e futuro di tecnologia den educacion.
