Cambio di clima mester bira indicador principal pa turismo Aruba
*Resultado financiero positivo Wever-Croes mester sirbi adaptacion
*Infrastructura social y economico ta depende di desaroyo di naturaleza
ORANJESTAD (AAN) — “E lobo ta bini,”ta palabranan cu ta worde usa pa presenta situacionnan den cual alarma ta wordo bati pa peligro serio pero hende no kier acepta realidad di e peligro te na momento cu e presenta.
Despues cu pa decadanan di advertencia no a conoce resultado serio pa atende cu clima, di 5 pa 16 di Juni 1972, e prome conferencia cientifico di Nacionnan Uni, cu a haya e nomber di Prome Cumbre di Mundo (First Earth Summit) a presenta e puntonan cu mester a bira base pa maneho di medio ambiente.
Hende na decada 70 a braza tur loke el a considera importante pa su mes den e posibilidadnan cu adelanto tecnico a permiti y a presta entre otro mas atencion con pa yega luna y tur otro planeta cu pa preocupa su mes cu loke ta pasa cu planeta tera, cu ta determinante pa e existencia di e ser humano.
Na un forma rapido, hende mester a cuminsa admiti, cu e situacionnan di antes tabata di antes y cu hende mes cu e forma cu el a atende cu Planeta Tera, a crea condicionnan cu ta afecta su bida riba tur tereno, pa cuminsa cu su salud.
Mientras ciencia medico ta haci hopi hende kere cu inmortabilidad lo bira realidad den tur e sabiduria cu mundo a acumula, problemanan serio di salud a resulta mas y mas di cambio di clima, cu ta motibo di mas y mas condicionnan di salud cu ta afecta bida di hende na tur forma.
E cuminda cu hende mester pa alimenta su mes ta na peliger mescos cu su proteccion contra naturaleza cu awe ta presenta cambionan cu nunca mundo a kere di por admira manera ceronan cu no tin sneeuw mas, destruccion y amenaza di tur loke por considera parti di mundo manera hende conoce na e momentonan aki.
Manera DIARIO a pronostica for di 2023, awe na 2024 alarma grandi mester wordo bati sigur na Aruba, cu ta depende completamente di naturaleza pa su economia y sobrevivencia como isla.
Prome cu aborda e tereno kico a lo largo cambio di clima lo nifica pa subida di nivel di laman na un pais cu su construccionnan mas importante na costa, mester atende cu e resultadonan directo cu na e momentonan aki cambio di clima tin pa e ciudadano y e personanan cu ta bishita Aruba.
Durante e pandemia di Covid-19, prueba a wordo entrega na e generacionnan actual di Arubiano, cu economia di Aruba ta depende di turismo, cu ta fuente di trabou y asina entrada di e gran mayoria di trahadornan.
Sin e produccion turistico di Aruba ni sector comercial como productor democratico di trabou hunto cu aparato gubernamental, no tin placa suficiente pa mantene Aruba financieramente.
E fuente principal di pan di e Arubiano, cu ta turismo, ta na peligro cu cambio di clima, cu ta exigi proteccion di e turista pero tambe di e trahador y tur otro miembro di e comunidad Arubano.
Infrastructura di Aruba ta basa riba e clima manera a conoce, pero cu ya ta presenta problema serio pa empresa, trahador y gobierno cu conhuntamente mester tuma e medidanan necesario, sigur riba tereno cu no tin atencion.
Si tuma un un base special como ehempel cu ta mishi cu turista y cu ciudadanonan di Aruba, mester atende cu e realidad cu bida na Aruba ta transcuri a base di e ambiente natural pa loke ta trata loke hende ta bisti, su necesidadnan di cas, su forma di transportacion, condicionnan di localidadnan di trabou.
Den turismo, transportacion local ta sumamente importante no solamente pa e turista pero tambe pa e trahador, cu ta bini di diferente rango di trabou.
Con e trahador den mundo di turismo, cu mester brinda servicio 24 hora pa dia, ta yega trabou y bolbe cas? Con transporte publico ta regla y con mester adapta transporte publico na cambio di clima pa e trahador por yega su trabou pa duna servicio na e turista?
Con trahadornan riba beach ta atende cu e peliger cu exposicion na solo sigur den e santo blanco canto di laman, mescos cu tur cu ta atende cu water sports, ta labora y ta yuda gerencia alcansa e mihor formanan pa turistanan goza di loke Aruba ta ofrece sin pone nan salud na riesgo?
Con sector turistico ta consulta cu expertonan medico riba e tereno di problemanan di salud pa turistanan y con por atende cu prevencion di problemanan cu temperatura halto ta presenta na un forma mas eficaz?
Na 2025 Aruba ta bay urna electoral cu logronan financiero y economico enorme y hasta historico.
Na 2025 e programanan di gobernacion no mester ta basa riba gritonan politico pa causa emocion, pero manera Hulanda a bisa continuacion di bon gobernacion cu na prome lugar ta encera e bienestar directo di e Arubiano, cu mester sigui biba y traha den condiconnan di clima inclemente si ta necesario, pa sirbi hende, cu e turista ta, den condicionnan di clima cu conoce cambio acelera, cu Aruba como destinacion turistico mester atende.
