SETAR a firma contrato cu SKOA pa e scolnan subi e red di 'Fiber Optics'

ORANJESTAD (AAN): Durante un conferencia di prensa Diaranzon mainta, director di Setar N.V Roland Croes a papia riba e hecho cu pa algun tempo caba e compania ta poniendo cabelnan fibra optica na tur cas.

“Nos ta den Noord aworaki, pero den e lunanan cu ta bin nos lo bay den tur bario, unda cu e intencion ta pa pone tur hende riba ‘Fiber Optics’, segun Croes.

El a splica cu e speed di internet cu esaki lo aumenta significantemente.

E director di Setar a indica tambe cu e compania a evalua kico mas e por haci pa comunidad di Aruba y a conclui cu un di e cosnan mas importante cu Setar por haci ta contribui cu desaroyo di loke ta enseñanza.

“Enseñanza probablemente ta e cos mas importante pa un comunidad”.

E no ta crea solamente conocimento, sino e ta crea tambe te hasta hendenan critico, hendenan cu ta compronde y ta traha hunto pa un pais, segun Croes.

El a sigui bisa cu Setar ta kere cu contribuyendo cu enseñanza, e compania berdaderamente por yuda desaroyo di Aruba.

Croes a splica cu Setar a acerca diferente fundacion y tin diferente scol cu ta conecta caba riba Fiber Optics, manera entre otro Colegio Arubano Oranjestad y Universidad di Aruba, cu asina tin speednan mas halto di internet y cu prijsnan mas atractivo.

Diaranzon a firma un contrato cu SKOA y segun e director di Setar, pa SKOA esaki ta nifica cu den e dianan cu ta bin 17 di nan scolnan lo bay riba e red di Fiber Optics.

Durante e conferencia di prensa director di SKOA Anuesca Baly a gradici Setar pa e oportunidad.

“Aworaki nos ta cuminza enberdad cu 17 scol, pero ainda falta, mirando cu en total nos tin 46 scol”.

Si mi a compronde corectamente, pa otro aña tur nos scolnan  lo ta riba e red di Fiber Optics y esey kiermen mas calidad di digitalizacion den e klasnan, segun Baly.

El a sigui bisa cu SKOA ta hopi contento cu e desaroyo aki.

Minister di Enseñanza Geoffrey Wever na su turno a bisa cu ta un bunita momento pa wak cu Setar como empresa estatal un biaha mas ta contribui cu mehoracion di digitalizacion riba nos isla.

“Pa awe scoge SKOA,  cu ta un instancia hopi importante, pa e proyecto aki unda cu nan scolnan lo haya acceso na un velocidad mas halto ta algo hopi positivo”.

Pesey mi ta gradici gerencia di Setar pa e vision y e empleadonan di e compania pa na esfuerzonan pa por a yega te akinan, segun e mandatario.