Sesenta cursista a gradua y haya nan diploma di Supervisor y Management di Hotel na EPE

Docente Ernst Mohamed satisfecho y orguyoso:

ORANJESTAD (AAN) - Ernst Mohamed, docente na Enseñanza pa Empleo, di e curso di Supervisor y Management di Hotel, den un entrevista cu DIARIO a expresa su satisfaccion y agrado di a otorga Diplomanan di Graduacion na e mayoria di e cursistanan cu a sigui e opleiding menciona.

Luna pasa a gradua tres klas, un di Supervisor-I y un di Supervisor-2. “Nos ta spera di sigui cu e cursonan tambe pasobra nos ta trahando riba mas curso, pa nan avanza. Enseñanza pa Empleo ta preparando klas manera Sales & Marketing, Accounting,  pa ora nan cla tin hendenan den nos comunidad cu ta full cla pa tuma cualkier posicion”, meneer Mohamed a indica.

E biaha aki a gradua 60 persona. Tabata tin mas pero no tur a logra, Ernst Mohamed a comenta. Peo e ta contento cu 97% di esnan cu a sigui e curso a logra cab’e y gradua.

“E tabata dificil pasobra e personanan aki no ta bin les so, pero nan ta traha henter dia of tin di nan ta bin les y ta traha anochi te mainta trempan, pues tin hopi sacrificio y dedicacion y ta un honor pa mi gradua nan awe”, e docente a acentua.

E curso tin un duracion di 13 pa 15 siman, dependiendo di con ta bay cu e materia, y pa nan zorg pa slag y pasa examen sino pa e keda enfrente di e cursistanan pa nan uz’e den nan carera diario.

E diplomanan di  EPE ta reconoci y tin su valor y e ta subiendo asina hopi cu e curso aki a cuminza cu un klas di 12 persona, ya caba tin dos klas di casi 60 hende cu ta graduando den e ultimo dos periodonan.

Ernst Mohamed a menciona cu mayoria di e graduadonan tin trabao caba, pero tin un par cu no tabata emplea pero cu awo ta hayando e trabao cu nan mester. Incluso, tin algun graduado ya caba a wordo promovi pa supervisor, y esaki ta mustra cu EPE tin su validez y su poder. “Y mi ta contento di bisa cu hopi di nan ta usando e tacticanan cu mi ta siña nan den les, con pa maneha cu situacionnan, cu cliente, cu colega, cu management, etc., y asina nan por bay dilanti”, e docente a remarca.

Ernst Mohamed mes, tin 25 aña ta eherce docencia na Enseñanza pa Empleo y por wak con interesa e ministernan ta locual ta un bon empuhe, pasobra ora e cursistanan ta haya un diploma cu validez, nan ta haya e sosten cu nan mester. El a acentua cu door di perseverancia por logra e meta, y esey e cursistanan ta mustrando cu nan diploma.